रामलल्लाच्या विराजमानासाठी अयोध्या सज्ज

22 जानेवारीला महासोहळा

महाराष्ट्र न्यूज नेटवर्क : अभिजित डुंगरवाल

अयोध्या : ‘पुढील महिन्यात अयोध्येतील भव्य राम मंदिराच्या पांढऱ्याशुभ्र मकराना संगमरवरी गर्भगृहात प्रभू रामाची बालरूपातील मूर्ती स्थापन करण्यात येणार आहे,’ अशी माहिती ‘श्री रामजन्मभूमी मंदिर ट्रस्ट’ने बुधवारी दिली.

अयोध्येतील राममंदिराच्या लोकार्पणाचा सोहळा २२ जानेवारी रोजी होणार असून, त्यासाठी जोरदार तयारी करण्यात येत आहे. या पार्श्वभूमीवर, ट्रस्टचे सचिव चंपत राय यांनी मंदिराविषयी माहिती दिली. ते म्हणाले, ‘पाच वर्षांच्या बालकाला प्रतिबिंबित करणारी प्रभू रामाची ५१ इंच उंच मूर्ती, अर्थात् राम लल्लाची मूर्ती वेगवेगळ्या तीन डिझाइनमधून निवडली जाणार आहे. ज्या मूर्तीमधून दैवीपणा; तसेच लहान मुलाचे स्वरूप दिसेल, अशा मूर्तीची निवड केली जाईल.’
‘संपूर्ण मंदिराच्या बांधकामात एकूण २१ ते २२ लाख घनफूट दगड वापरण्यात आला आहे. एवढी मोठी दगडी रचना गेल्या १०० ते २०० वर्षांत उत्तर भारतातच नव्हे, तर दक्षिण भारतातील मंदिरांतूनही करण्यात आलेली नाही,’ असे राय यांनी मंदिराचे वर्णन करताना सांगितले. ‘मंदिराचा पाया ५६ स्तरीय कृत्रिम खडकाचा आहे. त्यानंतर उभारलेली रचना कर्नाटक आणि तेलंगणमधील १७ हजार ग्रॅनाइट ब्लॉकचा वापर करून जमिनीपासून २१ फूट उंचीवर आहे. मंदिराच्या बांधकामासाठी भरतपूर, राजस्थान येथील गुलाबी रंगाच्या वाळूचा सुमारे पाच लाख घनफूट दगड वापरण्यात येणार आहे. मंदिराचे गर्भगृह पांढऱ्याशुभ्र मकराना संगमरवरी खडकाने बांधण्यात आले असून, ते तयार आहे,’ असेही राय यांनी सांगितले.
‘राम मंदिर तीन मजली असेल. त्यापैकी मंदिराच्या तळमजल्याचे काम पूर्ण झाले असून, पहिल्या मजल्याचे बांधकाम सुरू आहे. मंदिराला चार कोपऱ्यांनी (प्राकार) वेढलेले आहे; त्याची लांबी सुमारे ७५० मीटर आहे. मंदिराची संरक्षक भिंत १४ फूट रुंद आहे.
प्राकार दुमजली असेल. भक्तांना वरच्या मजल्यावर मंदिराची प्रदक्षिणा करण्याची परवानगी असेल. मात्र, प्राकाराचे बांधकाम सुरू असून, ते पूर्ण होण्यास अद्याप सहा ते आठ महिने लागू शकतात,’ असे राय यांनी सांगितले.
दुकानांच्या शटरला ‘हिंदू थीम’
जानेवारीत होणाऱ्या लोकार्पण सोहळ्यापूर्वी अयोध्येतील रामपथ आणि इतर प्रमुख रस्त्यांच्या कडेला असलेल्या दुकानांचे शटर ‘हिंदू थीम’च्या कलाकृतींनी सजवण्यात आली आहेत.
रस्त्याच्या दोन्ही बाजूंच्या दुकानांवर ‘जय श्री राम’ हा जयघोष, स्वस्तिक चिन्ह आदी बाबींचा समावेश आहे. ‘शहर सजवण्याच्या प्रयत्नांचा एक भाग म्हणून स्थानिक अधिकाऱ्यांनी हे काम केले आहे,’ असे एका वरिष्ठ अधिकाऱ्याने सांगितले.
सहादतगंज आणि नया घाट यांना जोडणाऱ्या पुनर्विकसित १३ किलोमीटरच्या रस्त्याला आता ‘राम पथ’ नाव देण्यात आले आहे. या रस्त्यावरील दुकानांमध्ये ‘जय श्रीराम’चे ध्वज, रामाच्या प्रतिमा, राम दरबाराची छायाचित्रे दिसू येत आहेत.