‘स्वारगेट’ परिसरामध्ये चोरट्यांचा धुमाकूळ सुरूच

गर्दीमध्ये चोरटे साधतात संधी : पोलीस चोरट्यांचा बंदोबस्त कधी करणार

महाराष्ट्र ३६० न्यूज नेटवर्क

पुणे : स्वारगेट एसटी स्थानकाच्या आवारात चोरट्यांनी पुन्हा डोके वर काढले आहे. कोल्हापूरच्या बसमध्ये चढत असताना गर्दीचा फायदा घेऊन चोरट्यांनी रविवारी दुपारी ४० हजार रुपये किमतीचा मोबाइल लंपास केला. मोबाईल, पॉकेटमारी, सोनसाखळी चोरीच्या घटना दिवसेंदिवस वाढत आहेत. त्यामुळे पोलिसांचा वचक कमी झाला की काय अशी शंका नागरिकांच्या मनामध्ये येऊ लागली आहे. पोलिसांनी चोरट्यांचा बंदोबस्त करावा, अशी मागणी प्रवाशांकडून केली जात आहे.

राममोहन मुक्कावेल्ली (वय ५४, रा. वानवडी) यांनी स्वारगेट पोलीस स्टेशनमध्ये तक्रार दिली आहे. त्यानुसार अज्ञात व्यक्तीच्या विरोधात गुन्हा दाखल करण्यात आला आहे.

पोलिसांनी सांगितले की, तक्रारदार यांना कोल्हापूर येथे जायचे होते. त्यासाठी ते स्वारगेट बसस्थानक येथे रविवारी दुपारी थांबले होते. दुपारी एकच्या सुमारास कोल्हापूरला जाणाऱ्या बसमध्ये चढण्यासाठी ते दरवाज्याजवळ आले होते. त्यावेळी गर्दी होती. बसमध्ये चढत असताना तक्रारदार यांच्या वरील खिशातील ‘अॅपल’ कंपनीचा मोबाइल चोरला. बसमध्ये गेल्यानंतर त्यांना हा प्रकार लक्षात आला. त्यांनी तत्काळ त्या ठिकाणी शोध घेतला. पण, चोरटा सापडला नाही. या प्रकरणी त्यांनी स्वारगेट पोलिस ठाण्यात तक्रार दिली. त्यानुसार चोरीचा गुन्हा दाखल करण्यात आला आहे.

दोन दिवसांपूर्वीच स्वारगेट बसस्थानक परिसरात एका प्रवाशाचा मोबाइल चोरट्यांनी हिसकावून नेल्याची घटना घडली होती. स्वारगेट बस स्थानक परिसरात ‘सीसीटीव्ही’ कॅमेरे लावलेले आहेत. तरीही या ठिकाणी चोऱ्यांचे प्रकार सुरूच आहे. यापूर्वी घडलेल्या घटनांमधील आरोपींना अटक करण्यात अद्यापही यश आले नाही. पूर्वीदेखील चोरीच्या घटना वाढल्या होत्या. पण, त्यावेळी पोलिसांनी काही आरोपींना पकडल्यानंतर प्रकार कमी झाले होते. तसेच, बस स्थानक परिसरात गस्त वाढविण्यात आली होती. आता पुन्हा चोरीचे प्रकार वाढू लागले आहेत. त्यामुळे स्वारगेट पोलिसांची गस्त कमी पडत असल्याची चर्चा सुरू आहे.

कात्रज चौकात मोबाइल हिसकावला…

कात्रज चौकातून पायी जाणाऱ्या व्यक्तीला धक्का मारून त्याच्या हातामधील दहा हजार रुपये किमतीचा मोबाइल दोघांनी हिसकवून नेला. ही घटना शनिवारी रात्री दहाच्या सुमारास घडली. या प्रकरणी भारती विद्यापीठ पोलिस ठाण्यात चोरीचा गुन्हा दाखल करण्यात आला आहे. सर्जेराव राजाराम झोळे (वय २०, रा. नवी मुंबई) यांनी तक्रार दिली आहे. त्यानुसार दोन व्यक्तींच्या विरोधात गुन्हा दाखल करण्यात आला आहे.