वाळूमाफियांना पोलीस अधीक्षकांचा दणका

अवैध वाळू उपशावर कारवाई : एकूण २१ लाख ३४ हजार किमतीचा मुद्देमाल जप्त

महाराष्ट्र ३६० न्यूज नेटवर्क

सोलापूर : मोहोळ तालुक्यात वाळूमाफियांना पोलीस अधीक्षकांनी दणका दिला असून, अवैध वाळू उपशावर केलेल्या कारवाईत एकूण २१ लाख ३४ हजार किमतीचा मुद्देमाल जप्त करण्यात आला असून, चौघांना ताब्यात घेण्यात आले आहे.

पोलीस अधीक्षकांनी मौने शिंगोली (ता. मोहोळ) येथील वाळूमाफियांवर कारवाई केली असून, यारीद्वारे अवैध वाळू उपशावर केलेल्या कारवाईत एका यारी मशिगसह दोन ट्रॅक्टर ट्रॉली, दहा ब्रास वाळूसह एकूण २१ लाख ३४ हजार १०० रुपये किमतीचा मुद्देमाल जप्त केला आहे.
सोलापूर ग्रामीण पोलीस अधीक्षक तेजस्वी सातपुते यांनी जिल्ह्यातील अवैध वाळू माफियांवर कडक कारवाई करण्याबाबत एलसीबीचे पोलीस निरीक्षक सर्जेराव पाटील यांना सूचना दिल्या होत्या. त्यानुसार जिल्ह्यात चोरून चालणारे अवैध वाळूउपसा व वाळू वाहतुकीवर कडक कारवाई करण्याकरिता पोलीस निरीक्षक सर्जेराव पाटील यांनी गुन्हे शाखेकडील विशेष पथकाची नेमणूक केली आहे.

गुन्हे शाखेचे पोलीस निरीक्षक सर्जेराव पाटील यांना त्यांच्या बातमीदाराकडून बातमी मिळाली की, मौजे शिंगोली (ता. मोहोळ जि. सोलापूर) येथील सीना नदीच्या पात्रातून काही इसम यारी मशिनच्या सहाय्याने शासनाची परवानगी व रॉयल्टी नसताना चोरून वाळू काढून त्याचा साठा करून विक्री करीत असल्याची बातमी मिळाली होती.

गुन्हे शाखेचे पोलीस निरीक्षक सर्जेराव पाटील यांनी विशेष पथकातील पोलीस उपनिरीक्षक अमित सिद पाटील यांना तात्काळ कारवाई करण्याचे आदेश दिले. पोलीस उपनिरीक्षक अमित सिद पाटील यांनी पथकासह मौजे शिंगोली येथे जाऊन बातमीप्रमाणे खात्री केली असता, सदर ठिकाणी ट्रॅक्टरला लोखंडी यारी मशिन जोडून सिना नदीच्या पात्रातून वाळूउपसा करीत असल्याचे दिसून आले. त्यावरून वाळूउपसा पॉइंटची खात्री झाल्यानंतर तत्काळ सदर ठिकाणी जाऊन छापा टाकून वाळू भरण्यासाठी पॉइंटवर आलेली वाहने व वाळू भरून निघण्याच्या तयारीत असताना काही इसमांना गराडा घालून पकडले, तर काही इसम पळून गेले.

वाळू पॉइंटच्या ठिकाणाहून एक यारी मशिन संच, दोन ट्रॅक्टर ट्रॉलीसह दहा ब्रास वाळूसाठा असा एकूण २१ लाख ३४ हजार १०० रु. किमतीचा मुद्देमाल जप्त करण्यात आला असून, एकूण चार आरोपींना ताब्यात घेण्यात आले आहे. सदर बाबत कामती पोलीस ठाण्यात गुन्हा दाखल करण्यात आला आहे.

सदरची कामगिरी ही, पोलीस अधीक्षक तेजस्वी सातपुते, अपर पोलीस अधीक्षक हिंमत जाधव यांच्या मार्गदर्शनाखाली एलसीबीचे पोलीस निरीक्षक सर्जेराव पाटील यांच्या नेतृत्वाखाली पोलीस उपनिरीक्षक अमित सिद पाटील, पोलीस अंगलदार संदीप बहुवान काशिद, मोहन शामकर्ण मनसावाले, हरीदास अगतराव पांढरे, सुरज शिवाजी जाधव, दिलीप बाबूराव राऊत सर्व नेमणूक स्थानिक गुन्हे शाखा सोलापूर ग्रामीण व चालक नागनाथ अण्णाराव पाटील नेमणूक मोटार परिवहन विभाग सोलापूर ग्रामीण यांनी केली आहे.