दहशत माजविणाऱ्या सिध्दांत मराठेवर स्थानबध्दतेची कारवाई
पी.सी.बी. गुन्हे शाखेचा दणका
महाराष्ट्र न्युज नेटवर्क : अभिजित डुंगरवाल
पुणे: कोथरुड पोलीस ठाणे परिसरात दहशत माजविणाऱ्या, सिध्दांत उर्फ सिद्या मराठे, या गुन्हेगारावर स्थानबध्दतेची कारवाई करण्यात आली.
पी.सी.बी. गुन्हे शाखेने ही कारवाई केली. सिध्दांत मराठे, (वय २४ वर्षे, रा. प्रतिकनगर, जय भवानीनगर समोर, कोथरूड) याला ताब्यात घेण्यात आले आहे. नागपूर मध्यवर्ती कारागृह, नागपूर येथे १ वर्षाकरीता स्थानबध्दतेचे आदेश देण्यात आले आहेत. पुणे पोलीस आयुक्तालयातील कोथरुड पोलीस स्टेशनच्या हद्दीमध्ये गुन्हे करणारा हा अभिलेखावरील सराईत गुन्हेगार आहे. त्याने साथीदारांसह कोथरुड पोलीस स्टेशनच्या हद्दीत कोयते, चाकु, तलवार, रॉड या सारख्या जीवघेण्या घातक हत्यारांसह खुनाचा प्रयत्न, गंभीर दुखापत, जाळपोळ, दंगा, बेकायदा हत्यार बाळगणे यासारखे गंभीर स्वरुपाचे गुन्हे केले आहेत. मागील ५ वर्षामध्ये त्याच्याविरूध्द ५ गंभीर गुन्हे दाखल आहेत. त्याच्या गुन्हेगारी कृत्यामुळे परिसरातील सार्वजनिक सुव्यवस्थेस बाधा निर्माण झालेली होती. तसेच त्याच्यापासून जीविताचे व मालमत्तेचे नुकसान होईल या भितीमुळे नागरिक उघडपणे तक्रार करण्यास धजावत नव्हते. ही कामगिरी पोलीस आयुक्त रितेश कुमार, वरिष्ठ पोलीस निरीक्षक, कोथरुड पोलीस स्टेशन हेमंत पाटील, वरिष्ठ पोलीस निरीक्षक, पी.सी.बी. गुन्हे शाखा चंद्रकांत बेदरे यांच्या मार्गदर्शनाखाली पोलीस अधिकारी व पोलीस अंमलदार यांनी पार पाडली. स्थानबध्दतेची ही ८७ वी कारवाई आहे.
