पुजा खेडकर यांच्या आई मनोरमा खेडकर यांचा शस्त्र परवाना रद्द

पोलीस आयुक्त अमितेशकुमार यांचा आदेश, घरातील दरोड्याबाबत अजूनही पोलीस अंधारात

महाराष्ट्र न्यूज नेटवर्क

पुणे : वादग्रस्त आयएएस पुजा खेडकर यांच्या आई मनोरमा खेडकर यांनी शेतकऱ्याला पिस्तुलाचा धाक दाखविल्याची घटना उघडकीस आल्यानंतर पोलीस आयुक्त अमितेशकुमार यांनी मनोरमा खेडकर यांचा शस्त्र परवाना गेल्या आठवड्यात रद्द केला आहे. त्यांच्या बाणेर रोडवरील बंगल्यात नोकराने गुंगीचे औषध देऊन दरोडा टाकण्याची घटना शनिवार मध्यरात्री घडली होती. त्यात बेशुद्ध असलेल्या पाचही जणांची प्रकृती आता सुधारत आहे. पुजा खेडकर व त्यांच्या कुटुंबातील कोणीही पोलिसांना अद्याप कोणतीही माहिती दिलेली नाही.

मुळशी तालुक्यातील धडवली गावात एका शेतकऱ्याला मनोरमा खेडकर यांनी पिस्तुलाचा धाक दाखविल्याची घटना २०२४ मध्ये घडली होती. याबाबतचा व्हिडिओ सोशल मीडियावर व्हायरल झाला होता.

त्यानंतर या प्रकरणी मनोरमा खेडकर यांच्यासह ७ जणांवर पौड पोलीस ठाण्यात गुन्हा दाखल झाला आहे. तसेच त्यांच्याविरुद्ध नवी मुंबईतील रबाळे व चतु:श्रृंगी पोलीस ठाण्यातही गुन्हे दाखल आहेत. या पार्श्वभूमीवर पोलिसांनी मनोरमा खेडकर यांना शस्त्र परवाना रद्द करण्याबाबत नोटीस बजावली होती.

त्यानुसार त्यांनी पोलीस आयुक्त अमितेशकुमार यांना भेटून खुलासा केला होता. मात्र त्यांचा खुलासा समाधानकारक न वाटल्याने पोलीस आयुक्त अमितेशकुमार यांनी ६ जानेवारी २०२६ रोजी त्यांचा शस्त्र परवाना रद्द करण्याचा आदेश काढला.

खेडकर यांच्या नॅशनल हौसिंग सोसायटीतील बंगल्यात नोकराने जेवणातून गुंगीचे औषध देऊन घरातील पाच जणांना बेशुद्ध केले होते. पुजा खेडकर यांचे हातपाय बांधून ठेवून घरातील चीजवस्तू व मोबाईल चोरून नेण्यात आले आहेत. मात्र खेडकर कुटुंबाकडून अद्याप कोणतीही माहिती न दिल्याने चोरट्यांनी घरातून नेमके काय चोरून नेले, याचा तपशील समोर आलेला नाही.

मनोरमा खेडकर यांना नोटीस बजावल्यानंतर त्यांनी खुलासा सादर केला. तो समाधानकारक वाटला नाही. खेडकर यांचे वर्तन कायद्याला न जुमानणारे आहे. भविष्यात त्यांच्याकडून कायदा व सुव्यवस्थेचा प्रश्न निर्माण होऊ शकतो. कुटुंबातील व्यक्ती तसेच सामान्य नागरिकांच्या जीवितास धोका पोहोचू शकतो. शस्त्राचा दुरुपयोग करून अटी-शर्तींचा भंग केला जाण्याची शक्यता आहे. खेडकर शस्त्र बाळगण्यास योग्य व्यक्ती नाहीत. त्यामुळे त्यांचा शस्त्र परवाना रद्द करण्यात येत आहे. — अमितेशकुमार, पोलीस आयुक्त

मनोरमा खेडकर या कालपर्यंत व्हेंटिलेटरवर होत्या. इतरांचीही प्रकृती सुधारली आहे. आतापर्यंत कोणीही हा प्रकार कसा घडला याबाबत स्टेटमेंट दिलेले नाही. डॉक्टरांच्या परवानगीनंतर पोलीस आज त्यांचे स्टेटमेंट घेण्याचा प्रयत्न करणार आहेत. त्यानंतर हा सर्व प्रकार कसा घडला हे समोर येऊ शकेल. — रजनीकांत चिलुमुला, पोलीस उपायुक्त, परिमंडळ ४