गतिरोधकावर ब्रेक दाबल्याने ज्येष्ठाची कंबर मोडली

सातारा रस्त्यावर अपघात : सहकारनगर पोलिसांत बसचालकाविरुद्ध पुण्यात गुन्हा

महाराष्ट्र ३६० न्यूज नेटवर्क

पुणे : सातारा रोडवरील गतिरोधकावरुन जाताना अचानक अर्जंट ब्रेक दाबल्याने बसमधील प्रवासी बसमध्ये आदळून पडल्याने त्यांचे कमरेचे हाड मोडल्याचा प्रकार समोर आला आहे. ही घटना सातारा रोडवरील राव नर्सिंग होमसमोर गुरुवारी) २१ डिसेबर रोजी सकाळी ६ वाजता घडली.

याप्रकरणी कृष्णा हनमंतराव बबलादी (वय ५६, रा. मोरवाडी, पिंपरी) यांनी सहकारनगर पोलीस ठाण्यात फिर्याद दिली आहे. त्यानुसार सहकारनगर पोलिसांनी ट्रॅव्हल बसचालकावर गुन्हा दाखल केला आहे.

पोलिसांनी सांगितले की, सध्या एसटीचा संप असल्याने खासगी ट्रॅव्हल बसना प्रवासी घेऊन जाण्यास परवानगी दिली आहे. फिर्यादी हे खासगी बसने जात होते. यावेळी बसचालक वेगाने वेडीवाकडी बस चालत होता. राव नर्सिंग होमसमोर स्पीड ब्रेकरचा त्याला अगोदर अंदाज आला नाही. त्याने स्पीड ब्रेकरवर बस आली असताना अर्जंट ब्रेक दाबला. त्यामुळे फिर्यादींचा तोल गेला. ते बसमध्ये आदळून खाली पडले.
त्यात त्यांच्या कमरेचे हाड फ्रॅक्चर झाले. त्यावर त्यांनी उपचार घेतल्यानंतर आता पोलिसांकडे फिर्याद दिली आहे. पोलीस हवालदार गायकवाड तपास करीत आहेत.