एमपीएससीची तयारी करणार्‍या सांगलीतील विद्यार्थ्याची आत्महत्या

विश्रामबाग पोलिसांत फिर्याद : भाऊ पिंपरी-चिंचवड आयुक्तालयात पोलिस उपनिरीक्षक

महाराष्ट्र ३६० न्यूज नेटवर्क

पुणे : पुण्यातील नवी पेठेत विठ्ठल मंदिराच्या पाठीमागे एमपीएससीची तयारी करणाऱ्या तरुणाने विषारी औषध घेऊन आत्महत्या केली. ही धक्कादायक घटना शनिवारी (दि. १५ जानेवारी २०२२) दुपारी एक वाजण्याच्या सुमारास उघडकीस आली आहे.

अमर रामचंद्र मोहिते (33, रा. नवी पेठ, विठ्ठल मंदिराच्या मागे. मुळ गाव- तासगाव, सांगली) असे आत्महत्या केलेल्या तरुणाचे नाव आहे.
पोलिसांनी सांगितले की, अमर यांचे भाऊ दत्तात्रय रामचंद्र मोहिते हे पिंपरी-चिंचवड पोलिस आयुक्तालयाच्या हद्दीतील भोसरी पोलिस ठाण्यात पोलिस उपनिरीक्षक म्हणून कार्यरत आहेत. पोलिस उपनिरीक्षक दत्तात्रय मोहिते यांना भाऊ अमर बाबत काही तरी माहिती मिळाली होती. त्यानंतर त्यांनी आज दुपारी एक वाजण्याच्या सुमारास त्यांच्या एका मित्राला आणि विश्रामबाग पोलिस ठाण्यात माहिती दिली.

विश्रामबाग पोलिस ठाण्यातील अधिकारी आणि कर्मचार्‍यांनी घटनास्थळी भेट दिली. दरम्यान, अमरने खोलीचे दार बंद केले होते. दरवाजा तोडून आत प्रवेश केल्यानंतर तो झोपलेल्या अवस्थेत आढळून आला. त्याच्या तोंडातून फेस येत होता. त्यानंतर रूग्णवाहिका बोलाविण्यात आली. विश्रामबाग पोलिस ठाण्याचे पोलिस निरीक्षक (गुन्हे) कुंडलिक कायगुडे यांनी आणि इतरांनी घटनास्थळी भेट दिली आहे. आत्महत्येचं नेमकं कारण अद्याप समोर आलं नाही. याप्रकरणी विश्रामबाग पोलिस ठाण्यात नोंद करण्यात आली आहे. आत्महत्येचे कारण समजू शकले नाही. पुढील तपास पोलीस करीत आहेत.