स्पर्धा परीक्षेची तयारी करणार्या तरुणाने उचलले टोकाचे पाऊल
नवी पेठेतील घरात गळफास घेऊन संपविले जीवन
महाराष्ट्र न्यूज नेटवर्क
पुणे : स्पर्धा परीक्षेची तयारी करणाऱ्या एका तरुणाने टोकाचे पाऊल उचलून आपले जीवन संपविले आहे. नवी पेठेतील घरामध्ये शुक्रवारी दुपारी हा प्रकार समोर आला. तरुणाने नैराश्यातून हे पाऊल उचलल्याची शक्यता पोलिसांनी व्यक्त केली आहे.
सागर सुभाष पवार (वय २६, रा. मेहेकर, जि. बुलढाणा) असे या तरुणाचे नाव आहे. सागर मूळचा बुलढाणा जिल्ह्यातील असून तो गेल्या ४ वर्षांपासून पुण्यात राहात होता. तो स्पर्धा परीक्षेची तयारी करत होता.
नवी पेठेत तो मित्रांबरोबर रहात होता. शुक्रवारी दुपारी त्याच्या खोलीचा दरवाजा बंद होता. त्याच्या मित्रांनी दरवाजा वाजविला; मात्र त्याने प्रतिसाद दिला नाही. मित्रांनी या घटनेची माहिती पोलीस नियंत्रण कक्षाला दिली. त्यानंतर पोलिसांनी दरवाजा तोडला. तेव्हा सागरने गळफास घेतल्याचे आढळून आले.
नैराश्यातून कृत्य केल्याचा संशय – सागर पवार यांच्या आत्महत्येमागील निश्चित कारण समजू शकले नाही. पोलिसांनी त्याच्या मित्रांकडे चौकशी केली. गेल्या काही दिवसांपासून तो नैराश्यात होता. त्याने नैराश्यातून टोकाचे पाऊल उचलले असल्याचा पोलिसांचा संशय आहे. या घटनेची माहिती त्याच्या कुटुंबीयांना कळविण्यात आली आहे. याप्रकरणी विश्रामबाग पोलीस ठाण्यात अकस्मात मृत्यूची नोंद करण्यात आली आहे, अशी माहिती पोलीस निरीक्षक प्रदीप कसबे यांनी दिली.
