हवेली पोलिसांत अपहरणाची फिर्याद : अग्निशमन दलाच्या जवानांनी दोरखंडाच्या साहाय्याने काढला मृतदेह
महाराष्ट्र 360 न्यूज नेटवर्क
पुणे : खडकवासला येथील चिंतामणी हाईट्स इमारतीच्या व्हेंटीलेशन डक्टमध्ये 16 वर्षाच्या मुलीचा मृतदेह सडलेल्या अवस्थेत आढळल्याने प्रचंड खळबळ उडाली आहे. ही मुलगी दहावीची परीक्षा देत होती. तिच्या आईने 30 मार्चला हवेली पोलीस स्टेशनमध्ये मुलीचे अपहरण झाल्याची तक्रार दिली होती. हीना शब्बीर पठाण असे मृतदेह सापडलेल्या मुलीचे नाव आहे.
पोलिसांनी सांगितले की, पहिल्या मजल्यावर राहणाऱ्या रहिवाशांना मोठ्या प्रमाणात दुर्गंधी येत असल्याने खिडकीतून व्हेंटीलेशनच्या डक्टमध्ये डोकावून पाहिले. त्यावेळी त्यांना मृतदेह दिसून आला. या इमारतीत राहणार्‍यांनी हवेली पोलीस स्टेशनला माहिती दिली. काही वेळात तिथे पोलीस आणि अग्निशामक दलाचे जवान शुक्रवारी रात्री दाखल झाले. दुसऱ्या दिवशी सकाळी पुणे महानगर प्रदेश विकास प्राधिकरणाच्या नांदेड सिटी अग्निशमन केंद्राच्या जवानांनी दोरखंडाच्या सहाय्याने मृतदेह डक्टच्या बाहेर काढला. मृतदेह सडलेला असल्यामुळे त्याची ओळख पटणं अशक्य होतं. मात्र, पोलिसांनी रहिवाशांकडे चौकशी केली. त्यानंतर ओळख पटली आणि मुलगी त्याच इमारतीतील असल्याचं स्पष्ट झालं. हीनाच्या आईने 30 मार्चला पोलीस स्टेशनमध्ये अपहरण झाल्याची तक्रार दाखल केली होती. त्या गुन्ह्याच्या अनुषंगाने तपास करताना हिनाचे सोलापूरमधील एका तरूणासोबत झालेले व्हॉट्सअप चॅट मिळालं आहे. त्या बाजूनेही तपास चालू आहे. दरम्यान, हीना 10 वीत असल्याने तिचे बोर्डाचे पेपर चालू होते. 30 मार्च आणि 1 एप्रिलला ती पेपरला हजर राहिली नाही. तिच्या भावाला शिक्षकांनी विचारणा केली त्यावेळी तिच्या पायाला दुखापत झाल्याचं सांगितलं होतं. त्यामुळे आता पोलिसांनी वेगाने तपासाला सुरूवात केली आहे. पुढील तपास हवेली पोलिस करीत आहेत.
