शिवाजीनगर पोलीसांची कारवाई : गावठाण परिसरात माजवत होता दहशत
महाराष्ट्र ३६० न्यूज नेटवर्क
पुणे : शहरातील शिवाजीनगर गावठाण परिसरात दहशत माजवत शारीरिक इजा पोचवून जनतेला वेठीस धरुन पोलीसांच्या शासकीय कामात अडथळा निर्माण करण्यासारखे गंभीर स्वरूपाचे गुन्हे करणाऱ्या सराईत गुन्हेगाराला पुणे शहर परिमंडळ एकचे पोलीस उपआयुक्त प्रियंका नारनवरे यांनी कलम ५६ नुसार पुणे आणि पिंपरी-चिंचवड आयुक्तालयाच्या हद्दीतून दोन वर्षाकरिता तडीपारीचे आदेश पारित केले आहे.
समीर जयवंत जोशी (वय 26, रा. जोशी आळी शिवाजीनगर गावठाण, पुणे) असे शिवाजीनगर पोलीसांनी तडीपार करण्यात आलेल्या सराईत गुन्हेगाराचे नाव आहे. त्याच्यावर शासकीय कामात अडथळा आणल्याचे दोन गंभीर गुन्हे दाखल आहेत.
पोलीसांनी दिलेल्‍या माहितीनुसार, पुणे शहरातील गुन्हेगारांवर आळा घालण्यासाठी पुणे शहर पोलीस आयुक्त अमिताभ गुप्ता यांनी गुन्हेगारी टोळक्यांवर मोक्का, स्थानबद्ध व तडीपार अंतर्गत कारवाईचा बडगा उगारला आहे. पुण्यातील शिवाजीनगर पोलीस स्टेशन मधील रेकॉर्डवरील सराईत गुन्हेगार समीर जयवंत जोशी याला दोन वर्षासाठी पुणे आणि पिंपरी-चिंचवड आयुक्तालयाच्या हद्दीत दोन वर्षाकरिता तडीपार करण्यात आले आहे.
आरोपी समीर जयवंत जोशी हा सराईत गुन्हेगार असून त्याने त्याच्या इतर साथीदारांच्या मदतीने शिवाजीनगर गावठाण परिसरात दहशत माजवणे, शारीरिक इजा पोचवून नागरिकांना वेठीस धरणे व पोलीसांच्या शासकीय कामात अडथळा निर्माण केल्याचे गंभीर स्वरूपाचे गुन्हे केले आहेत. तसेच आरोपींनी शिवाजीनगर पोलीस स्टेशनच्या हद्दीत वारंवार गुन्हे केल्याचे निष्पन्न झाले आहेत. त्याला वारंवार समज देऊनही त्याच्या वर्तवणूकीत कोणतीही सुधारणा होत नसल्याने त्याच्या गुन्हेगारी प्रवृत्तीमुळे नागरीक त्याच्या विरोधात तक्रार देण्यासाठी पुढे येत नसल्याने शिवाजीनगर पोलीस स्टेशनचे वरिष्ठ पोलीस निरीक्षक अरविंद माने व गुन्हे पोलीस निरीक्षक विक्रम गौड यांच्या निर्देशानुसार सर्व्हीलन्स पथकाचे प्रभारी अधिकारी सहाय्यक पोलीस निरीक्षक भोलेनाथ अहिवळे, पोलीस उपनिरीक्षक भैरवनाथ शेळके, पोलीस अंमलदार राहुल होळकर, दिलीप नांगरे व अनिकेत भिंगारे यांनी सराईत गुन्हेगार समीर जयवंत जोशी यांच्या विरोधात तडीपारीचा प्रस्ताव तयार करून सहाय्यक पोलीस आयुक्त रमाकांत माने यांच्यामार्फत पोलीस उपायुक्त यांच्या कार्यालयात पाठवला. या प्रस्तावाची पडताळणी करून पोलीस उपायुक्त यांनी शुक्रवारी (दि.१० जून) सराईत गुन्हेगार समीर जयवंत जोशी याला पुणे शहर, पिंपरी-चिंचवड आयुक्तालय व पुणे जिल्ह्यातून दोन वर्षांकरिता तडीपार करण्याचे आदेश पारित केले आहेत.
सदरची कारवाई ही, पुणे शहर पश्चिम प्रादेशिक विभागाचे अप्पर पोलीस आयुक्त राजेन्द्र डहाळे, पुणे शहर परिमंडळ एकचे पोलीस उपायुक्त प्रियंका नारनवरे, सहाय्यक पोलीस आयुक्त रमाकांत माने यांच्या मार्गदर्शनाखाली पुणे शहरातील शिवाजीनगर पोलिस स्टेशनचे वरिष्ठ पोलीस निरीक्षक अरविंद माने व गुन्हे पोलीस निरीक्षक विक्रम गौड यांच्या निर्देशानुसार सर्व्हीलन्स पथकाचे प्रभारी अधिकारी सहाय्यक पोलीस निरीक्षक भोलेनाथ अहिवळे, पोलीस उपनिरीक्षक भैरवनाथ शेळके, पोलीस अंमलदार राहुल होळकर, दिलीप नांगरे व अनिकेत भिंगारे यांनी केली आहे.
