एम.पी.डी.ए. कायद्यांतर्गत येरवडा मध्यवर्ती कारागृहात रवानगी : भारती विद्यापीठ पोलीस स्टेशन पुणे शहर
महाराष्ट्र ३६० न्यूज नेटवर्क
पुणे : पोलीस स्टेशनकडील सराईत गुंड विशाल शिवाजी शेळके (वय २०) यास भारती विद्यापीठ पोलिसांनी एम.पी.डी.ए. कायद्यांतर्गत येरवडा मध्यवर्ती कारागृह, पुणे येथे स्थानबद्ध केले आहे.
भारती विद्यापीठ पोलीस स्टेशन पुणेचा गुन्हे अभिलेखावरील सराईत व अट्टल गुन्हेगार विशाल शिवाजी शेळके (वय २०, रा. भोलेनगर, आंबेगाव खुर्द, पुणे) याच्याविरुद्ध भारती विद्यापीठ पोलीस स्टेशन येथे सन २०२० पासून खुनाचा प्रयत्न करणे, बेकायदा जमाव जमविणे, घातक हत्यारे जवळ बाळगणे, दुखापत करणे, दरोडा, जबरी चोरी, अपहरण, मालमत्तेचे नुकसान करणे, धमकी देणे तसेच शिवीगाळ करणे यासारखे एकूण चार गुन्हे दाखल आहेत. स्थानबद्ध इसमाच्या वाढत्या गुन्हेगारी कारवाईंना आळा घालणे गरजेची असल्याने त्याच्यावर सीआरपीसी ११० (अ) (ई)(ग) प्रमाणे कारवाई करण्यात आली होती. त्यानंतरदेखील स्थानबद्ध इसमाविरुद्ध तीन दखलपात्र गुन्हे दाखल आहेत. स्थानबद्ध इसमावर प्रतिबंधक कारवाई करूनही त्याच्या गुन्हेगारी वर्तनात काही एक सुधारणा झालेली नव्हती.
नमुद सराईत गुंड व स्थानबद्ध विशाल शेळके याचेविरुद्ध वेळोवेळी प्रतिबंधक कारवाई करूनही त्याचे गुन्हेगारी वर्तनात काहीएक सुधारणा झाली नव्हती. तो अत्यंत क्रूर, खुनशी भांडखोर व धोकादायक असून तो लोकांमध्ये काहींना काही कुरापती काढून मारहाण करून गंभीर स्वरूपाचे गुन्हे करीत होता. तेथील सर्वसामान्य शांतताप्रिय नागरिकांना विनाकारण त्रास देऊन आपला गुन्हेगारी हेतू साध्य करीत आहे, तसेच बेकायदा घातक शस्त्र जवळ बाळगून लोकांमध्ये दहशत निर्माण केली आहे.
त्याचे दहशतीमुळे व भीतीपोटी त्याच्याविरुद्ध तक्रार देण्यास कोणीही पुढे येत नव्हते. त्याचे अशा कृत्यामुळे सर्वसामान्य नागरिकांच्या मनात भीती निर्माण होऊन त्यांच्या जीविताला व मालमत्तेला धोका निर्माण झाला होता. म्हणून वरिष्ठ पोलीस निरीक्षक जगन्नाथ कळसकर यांनी त्यास स्थानबद्ध करण्याबाबतचा प्रस्ताव पोलीस आयुक्तांना सादर केला होता. त्यांनी सदर प्रस्तावाचे अवलोकन करून येरवडा मध्यवर्ती कारागृह पुणे येथे स्थानबद्ध करण्याचे आदेश दिले. त्याप्रमाणे भारती विद्यापीठ पोलीस स्टेशनकडून नमुद गुन्हेगारास ताब्यात घेऊन येरवडा मध्यवर्ती कारागृह, पुणे येथे स्थानबद्ध करण्यात आले आहे.
सराईत गुन्हेगाराकडून अशा प्रकारे कोणताही अनुचित प्रकार घडू नये यासाठी त्यांच्या विरुद्ध कठोर कारवाई करण्याचे संकेत पोलिसांनी दिले आहेत.
सदरची उल्लेखनीय कामगिरी ही, पोलीस आयुक्त अमिताभ गुप्ता, पोलीस सहआयुक्त डॉ. रवींद्र शिसवे, अपर पोलीस आयुक्त राजेंद्र डहाळे, पोलीस उपआयुक्त सागर पाटील, सहायक पोलीस आयुक्त सुषमा चव्हाण यांच्या मार्गदर्शनाखाली वरिष्ठ पोलीस निरीक्षक जगन्नाथ कळसकर, पोलीस निरीक्षक (गुन्हे) संगीता यादव, पोलीस निरीक्षक विजय पुराणिक, सहायक पोलीस निरीक्षक वैभव गायकवाड व पोलीस अंमलदार कृष्णा बढे, चंद्रकांत गाने, महेश बारवकर, नीलेश ढमढेरे, अमित शेडगे यांनी केली आहे.
पोलीस आयुक्त अमिताभ गुप्ता यांनी सक्रिय व दहशत निर्माण करणाऱ्या अट्टल गुन्हेगारांवर कडक प्रतिबंधक कारवाई करण्याचे धोरण अवलंबिले आहे. त्या अनुषंगाने पोलिसांकडून समाजकंटक व अट्टल गुन्हेगार यांचे हालचालीवर बारकाईने लक्ष ठेवण्यात येत आहे. मागील १२ महिन्यांच्या कालावधीत ३७ गुन्हेगारांना एमपीडीए कायद्यान्वये स्थानबद्ध केले आहे. यापुढेही सराईत व अट्टल गुन्हेगारांचे कृत्यांना आळा घालण्यासाठी या प्रमाणे कडक कारवाई करण्याचे ठरविले आहे.
