पोलीस सहआयुक्त डॉ. रवींद्र शिसवे यांचा चौदा दिवसांसाठी अध्यादेश
महाराष्ट्र ३६० न्यूज नेटवर्क
पुणे : नवरात्रोत्सव काळात कायदा व सुव्यवस्था राखण्याचे दृष्टिकोनातून पोलीस सहआयुक्त डॉ. रवींद्र शिसवे यांनी पुणे शहरात चौदा दिवसांसाठी प्रतिबंधात्मक आदेश जारी करत तसा अध्यादेश काढला आहे. यानुसार दि. 5 ते 18 ऑक्टोबर या 14 दिवसांत स्फोटपदार्थ आणि शस्त्रे बाळगणे, पुढाऱ्यांच्या चित्राचे प्रतिमेचे प्रदर्शन व दहन करणे, मोठ्याने अर्वाच्च घोषणा देणे, वाद्य वाजविणे अशा गोष्टींवर बंधन घातले गेले आहे.
दिनांक ०७/१०/२०२१ रोजी नवरात्र उत्सव (घटस्थापना) असून दिनांक १५/१०/२०२० रोजी विजयादशमी (दसरा) आहे. पुणे शहर पोलीस आयुक्तालयाचे कार्यक्षेत्रामध्ये कायदा व सुव्यवस्था राखण्याचे दृष्टिकोनातून महाराष्ट्र पोलीस अधिनियम, सन १९५१ चे कलम ३७ (१) (३) चे मनाई आदेश जारी करण्यात आले आहेत. त्यानुसार पुणे शहर पोलीस आयुक्तालय कार्यक्षेत्रात दिनांक ०५/१०/२०२१ रोजी ००.०१ वा. पासून ते दिनांक १८/१०/२०२१ रोजी २४.०० वा. पर्यंत १४ दिवसांसाठी काही नमूद केलेली कृत्ये करण्यास मनाई केली आहे.
या आहेत प्रतिबंधात्मक गोष्टी…
1) सोबत न बाळगण्याच्या गोष्टी…
अ) कोणताही दाहक पदार्थ अथवा स्फोटक पदार्थ, ज्वलनशील द्रव पदार्थ बरोबर नेणे.
ब) दगड अथवा शस्त्रे किंवा अस्त्रे, सोडावयाची अस्त्रे किंवा फेकावयाची हत्यारे अगर साधने बरोबर नेणे, जमा करणे व तयार करणे.
क) शस्त्रे, सोटे, भाले, तलवारी, दंड, काठया, बंदुका व शारीरिक इजा करण्यासाठी वापरात येईल अशी कोणतीही वस्तू बरोबर नेणे,
ड) कोणत्याही इसमाचे चित्राचे प्रतीकात्मक पुढाऱ्यांच्या चित्राचे प्रतिमेचे प्रदर्शन व दहन करणे.
इ) मोठ्याने अर्वाच्च घोषणा देणे, वाद्य वाजविणे,
फ) यामुळे सभ्यता अगर नीतिमत्ता यास धोका पोहचेल किंवा राज्याची सुरक्षितता धोक्यात येईल किंवा राज्य उलथवून देण्यास प्रवृत्त करेल अशी आवेशपूर्ण भाषणे करणे किंवा आविर्भाव करणे, कोणतेही जिन्नस तयार करून त्याचा जनतेत प्रसार करणे या कृत्यावर बंदी घालीत आहे.
ग) ज्यायोगे वरील परिसरात कायदा व सुव्यवस्था धोक्यात येईल अशा पद्धतीने महाराष्ट्र पोलीस अधिनियम
सन १९५१ च्या कलम ३७ (१), (३) विरुद्ध वर्तन करणे.
2) कोरोना विषाणू संसर्ग साखळी तोडण्यासाठीचा भाग म्हणून महापालिका आयुक्त पुणे यांचे आदेशानुसार (मआ/साप्रवि/४२७६ दि. १४/०८/२०२१) ‘लेवल्स ऑफ रिस्ट्रीक्शन्स फॉर ब्रेकींग द चेन’ कालावधी पुढील आदेशा पर्यंत पुणे महानगरपालिका कार्यक्षेत्रात लागु राहील असे आदेशीत केले आहे. तसेच सदर कालावधीत कोव्हीड-१९ या आजाराच्या प्रसारास प्रतिबंध करण्यासाठी उपाययोजना व मार्गदर्शक सूचना निर्गमित केलेल्या आहेत. त्यातील सर्व नियम, अटी, शर्ती व तरतुदी या आदेशास लागु राहतील. तसेच वरील आदेशाचे अनुषंगाने नव्याने शासनाकडून व शासकीय यंत्रणांकडुन लागु होणारे आदेश व त्यातील तरतुदीही लागू राहतील.
3) उपरोक्त आदेशाचे पालन करणे पुणे शहरातील नागरिकांना बंधनकारक राहील.
4) महाराष्ट्र पोलीस अधिनियम सन १९५१ च्या कलम ३७ चे पोटकलम (३) पाच किंवा पाच पेक्षा जास्त लोकांचा जमाव करण्यास पोलीस आयुक्त, पुणे शहर यांचे पूर्व परवानगी शिवाय सभा घेणेस किंवा मिरवणुक काढणेस बंदी घालीत आहे.
5) वरील संपूर्ण आदेश हा शासनाच्या सेवेतील व्यक्तींना व ज्यांना आपल्या वरिष्ठांच्या आदेशानुसार कर्तव्यपूर्तीसाठी हत्यार बाळगणे आवश्यक आहे त्यांना लागू होणार नाही.
6) सदरचे आदेशाला जाहिररीत्या ठळक प्रसिद्धी द्यावी.
7) या आदेशाचे उल्लंघन केल्यास संबंधित व्यक्ती महाराष्ट्र पोलीस अधिनियम सन १९५१ चे कलम १३५ प्रमाणे शिक्षेस पात्र होईल.
