पुणे जिल्ह्यातील खळबळजनक घटना : इंदापूर पोलीस स्टेशनमध्ये गुन्हा
महाराष्ट्र ३६० न्यूज नेटवर्क
पुणे : कांदलगाव (ता. इंदापूर, जि. पुणे) येथील 40 वर्षीय शेतकऱ्यास शेतातील औषधे आणण्यासाठी जात असताना बंदुकीच्या धाकाने लुटल्याची घटना उघडकीस आली. ही घटना हिंगणगाव येथे सोमवारी (दि. ११ ऑक्टोबर) सकाळी नऊच्या सुमारास घडली आहे. दुचाकीवरुन आलेल्या दोघांनी जातिवाचक शिवीगाळ करुन मारहाण केली. तसेच त्यांच्या गळ्यातील दोन तोळ्याची चेन, रोख रक्कम आणि दुचाकी चोरून नेली.
संजय शंकर सोनवणे (वय 40 रा. कांदलगाव, ता. इंदापूर, जि. पूणे) यांनी फिर्याद दिली असून, त्यानुसार इंदापूर पोलिस ठाण्यात धनु खराडे व सुधीर खराडे यांच्यावर गुन्हा दाखल केला आहे.
पोलिसांनी सांगितले की, फिर्यादी हे कांदलगाव येथुन औषधे आणण्यासाठी दुचाकी (एमएच. 42, 3364) मोटार सायकलवरून भिमानगर (ता.माढा) येथे जात होते. हिंगणगाव येथे आरोपींनी फिर्यादींची मोटार सायकल रस्त्यात जबरदस्तीने अडवली. तू आमच्याकडे सारखाच का बघतो असे म्हणत फिर्यादींला जातिवाचक शिविगाळ करत मारहाण केली. फिर्यादीचे दोन्ही हात पाठीमागे धरून फिर्यादीचे छातीला बंदूक लावली. खिशातील सात हजार रूपये रोख व गळ्यातील दोन तोळ्याची चेन काढून घेतली. फिर्यादींने आरोपींना प्रतिकार करण्याचा प्रयत्न केला. त्यावेळी आरोपी धणु खराडे याने ‘मी अगोदरच एक खुन करून जिरवला असुन त्यात मी निर्दोष सुटलो आहे. आता मी बंदुकीने तुझा खुन करीन’ असे म्हणत मारहाण केली. यावेळी फिर्यादींनी त्यांचे तावडीतुन सुटका करून घेतली व पुतण्याला फोन करून बोलावुन घेतल्याचे फीर्यादीत म्हटले आहे.
याप्रकरणी अनुसुचित जाती जमाती प्रतिबंधात्मक कायदा ( ॲट्रॉसिटी ) अंतर्गत गुन्हा दाखल झाला असून, भरदिवसा घडलेल्या घटनेने हिंगणगाव परिसरात मोठी खळबळ उडाली आहे.
पुढील तपास बारामती उपविभागीय पोलीस अधिकारी करत असल्याची माहिती इंदापूर पोलीसांनी दिली.
