लोणीकंद पोलिसांची कारवाई : नानासाहेब शिंदे यांच्या सांगण्यावरुन हल्ला
महाराष्ट्र ३६० न्यूज नेटवर्क
पुणे : लोणीकंद येथे टोळीयुद्धातून झालेल्या बाप-लेकाच्या हत्येप्रकरणी लोणीकंद पोलिसांनी तिघांना अटक केली आहे. याशिवाय निखिल पाटील, रुग्वेद वाळके, ऋतिक किनकर, निखिल नितीन जगताप, माऊली कोलते, अभि गव्हाणे, शुभम वागळे व इतर ४ ते ५ जणांविरुद्ध गुन्हा दाखल करण्यात आला आहे.
प्रतिक अनिल कंद (वय २८), नानासाहेब बाबुराव शिंदे (वय ६५) आणि आशितोष नानासाहेब शिंदे (वय ३२, सर्व रा. लोणीकंद) अशी अटक केलेल्यांची नावे आहेत.
पोलिसांनी सांगितले की, गेल्या वर्षी सचिन नानासाहेब शिंदे याचा गोळीबार करुन खून करण्यात आला होता. त्याचा बदला घेण्यासाठी त्या खूनातील जामिनीवर सुटलेल्या सनी शिंदे व त्याचे वडिल कुमार मारुती शिंदे (वय ५०) यांच्यावर कोयता, दांडके व दगडाने मारहाण करुन त्यांचा बुधवारी सायंकाळी निर्घुण खून करण्यात आला होता. या हल्ल्यात मिनल सचिन शिंदे (वय २७) आणि कारचालक ज्ञानेश्वर ज्ञानबा चव्हाण (वय ४४) हेही जखमी झाले आहेत.
सचिन नानासाहेब शिंदे आणि सचिन किसन शिंदे हे दोघेही चुलत भाऊ होते. लोणीकंद, शिक्रापूर परिसरात दोघांमध्ये वर्चस्वातून टोळीयुद्ध सुरु झाले. त्यातूनच गेल्या वर्षी फेब्रुवारी २०२१मध्ये गोल्डमॅन सचिन नानासाहेब शिंदे याचा गोळ्या घालून खून करण्यात आला होता. याप्रकरणात सचिन किसन शिंदे याच्यासह १२ जणांना पोलिसांनी अटक केली होती. त्यातील सनी शिंदे याच्यासह काही जणांना जामीन मिळाला. सनी शिंदे याचा भाऊ सचिन शिंदे याच्या जामिनावर बुधवारी शिवाजीनगर न्यायालयात सुनावणी होती. त्यासाठी सनी, त्याचे वडिल कुमार, भावजयी मिनल शिंदे व चालक ज्ञानेश्वर चव्हाण हे कारने पुण्यात आले होते. मात्र, जीवाच्या भितीने जामीन मिळालेले इतर पुण्यात आले नव्हते. सुनावणी झाल्यानंतर ते कारने लोणीकंदला जात होते. तेव्हापासून हल्लेखोर त्यांचा पाठलाग करीत होते. लोणीकंदमधील जिल्हा परिषदेच्या शाळेजवळ नानासाहेब शिंदे व त्याच्या टोळक्यांनी गाडी आडवी घालून त्यांना थांबविले. दोन गाड्यातून आलेल्या हल्लेखोरांनी प्रथमेश ऊर्फ सनी याच्यावर कोयत्याने वार करुन व दगडाने मारून त्याचा खून केला. त्याला वाचविण्यासाठी मध्ये पडलेले त्याचे वडिल कुमार यांच्यावरही त्यांनी वार केला. त्यात दोघांचा जागीच मृत्यु झाला.
मिनल शिंदे व ज्ञानेश्वर चव्हाण यांनाही लाकडी दांडक्याने मारहाण केल्याने ते गंभीर जखमी झाले आहेत. सचिन शिंदे याचा गेल्या वर्षी झालेल्या खूनाचा बदला घेण्यासाठी नानासाहेब शिंदे याच्या सांगण्यावरुन हा खून करण्यात आला आहे. त्यामुळे आता पुन्हा टोळीयुद्ध पेटण्याची शक्यता व्यक्त केली जात आहे.
लोणीकंद पोलिस ठाण्याचे वरिष्ठ पोलिस निरीक्षक गजानन पवार यांच्या मार्गदर्शनाखाली पोलिस तपास करत आहेत.
