बिबवेवाडी पोलिसांत गुन्हा दाखल : २११ इंजेक्शन, औषधे व स्वीफ्ट कार जप्त
महाराष्ट्र ३६० न्यूज नेटवर्क
पुणे : शरीरयष्टी वाढविण्याकरिता डॉक्टरांचे प्रिस्क्रीप्शन द्वारेच विक्री करणे बंधनकारक असलेले मेफनटेरमाईन सल्फेट इंजेक्शन अवैधरित्या जवळ बाळगून त्याची बेकायदेशीरपणे विक्री करणाऱ्या चौघांना बिबवेवाडी पोलीसांनी अटक केली आहे. त्यांच्या ताब्यातून २११ इजेक्शन, औषधाचे बॉटल्स, एक स्विफ्ट कार असा एकूण दोन लाख सहा हजारांचा मुद्देमाल जप्त करण्यात आल्याची माहिती परिमंडळ-५च्या पोलीस उपआयुक्त नम्रता पाटील यांनी दिली आहे.
याप्रकरणी परेश निवृत्ती रेणुसे (वय-३३, रा. धनकवडी, पुणे), प्रविणसिंग पुकसिंग भाटी (२३, रा. शिवणे, पुणे), अक्षय संभाजी वांजळे (२६, रा. वारजे, पुणे) व शैनक प्रकाश संकपाळ (२८, रा. बहिरटवाडी, पुणे) अशी अटक केलेल्या चौघांची नावे आहेत.
बिबवेवाडी पोलीस ठाण्याचे सहाय्यक पोलीस निरीक्षक प्रवीण काळुखे, पोलीस उपनिरीक्षक संजय आदलिंग गस्त घालत होते. त्यावेळी एक इसम डॉक्टरांचे प्रिस्क्रीप्शन शिवाय शरीरयष्टी वाढविण्याकरिता इंजेक्शनची विक्री करण्यासाठी बिबवेवाडी येथील डॉल्फीन चौकात येणार असल्याची माहिती मिळाली. त्यानुसार सापळा रचून आरोपीला ताब्यात घेत इंजेक्शनचे सहा बॉटल हस्तगत, जप्त करीत अधिक तपास करुन त्याचा साथीदाराकडून तसेच त्यांचे घरझडती घेऊन २११ बॉटल्स व एक कार मिळून आली. याबाबत अन्न औषध प्रशासनाचे औषध निरीक्षक अतिश सरकाळे यांनी बिबवेवाडी पोलीस ठाण्यात फिर्याद दिली आहे. याबाबत पुढील तपास बिबवेवाडी पोलीस करत आहे.
