दत्तवाडी पोलिसांची कामगिरी : तीन अल्पवयीन साथीदार ताब्यात
महाराष्ट्र 360 न्यूज नेटवर्क
पुणे : मित्राचाच खून करणाऱ्या सराईताला अटक करण्यात दत्तवाडी पोलिसांना यश मिळाले असून आरोपीच्या तीन अल्पवयीन साथीदारांना ताब्यात घेण्यात आले आहे.
दत्तवाडी पोलीस ठाण्यातील नोंदीनुसार, मंदार सुनील जोगदंड ( वय २३, रा. आंबिलओढा पुणे) याचा दि. १९ ऑक्टोबर रोजी रात्री साडेबाराच्या सुमारास सई हेरिटेज सोसायटी, सिंहगड रोड, पुणे समोरील मंदिरासमोर खून झाला होता. खुनामधील आरोपींचा दत्तवाडी पोलीस स्टेशनकडील तपास पथकातील अधिकारी व कर्मचारी वरिष्ठांच्या सूचनांनुसार तपास करत असताना पोलीस हवालदार कुंदन शिंदे, पोलीस अंमलदार शिवाजी क्षीरसागर, दयानंद तेलंगे पाटील यांना त्यांच्या खास बातमीदारांमार्फत बातमी मिळाली की, “सदरचा गुन्हा केलेले आरोपी हे निलायम पुलाखालील ओढ्याच्या लगत त्यांच्या मित्रांना भेटण्यासाठी येणार असून तेथून ते सोलापूर भागात पळून जाणार आहेत.”
अशी बातमी मिळाल्यानंतर तपासपथक अधिकारी व कर्मचारी यांनी तातडीने हालचाल करत आपआपसांत पथके स्थापन करत सदर ठिकाणी पळून जाणाऱ्या आरोपींना सापळा रचून पकडले असून,त्यापैकी साहिल भरत इजगद रा. स. नं. १२२, सावित्रीबाई फुले वसाहत, पु. ल. देशपांडे उदयानाशेजारी, सिंहगड रोड पुणे. या दत्तवाडी पोलीस स्टेशनकडील रेकॉर्डवरील सराईतास अटक केले असून त्याच्यासोबत पळून जाण्याच्या तयारीत असणाऱ्या दोन अल्पवयीन साथीदारांना १९ ऑक्टोबर रोजी ताब्यात घेण्यात आले आहे. तसेच २० ऑक्टोबर रोजी सदर गुन्ह्यातील त्यांचा मुख्य अल्पवयीन सूत्रधार यास दत्तवाडी पोलिसांनी हनुमाननगर, दत्तवाडी भागातील ओढ्यामध्ये लपून बसलेला असताना त्यास ताब्यात घेतले आहे.
सदर खून प्रकरणांतील आरोपी व मयत हे एकमेकांचे मित्र असून ते एकत्र दारू पिताना झालेल्या किरकोळ वादविवादातून अटक आरोपी व त्याचे अल्पवयीन साथीदार यांनी मंदार सुनील जोगदंड याचा निर्घृण खून केल्याचे आत्तापर्यंतच्या तपासात निष्पन्न झाले असून, सदर प्रकरणामध्ये त्यांना कोणी मदत केली काय? किंवा अजून त्यात कोणाचा हात आहे काय? याबाबत दत्तवाडी पोलीस सखोल तपास करीत आहेत. पुढील तपास सहायक पोलीस निरीक्षक युवराज पाटील, दत्तवाडी पोलीस चौकी हे करत आहेत. खून प्रकरणांतील आरोपींना पोलीसांनी तातडीने कारवाई करत तीन तासांत ताब्यात घेतले आहे.
सदरची कारवाई ही मा. अपर पोलीस आयुक्त राजेंद्र डहाळे, पोलीस उप-आयुक्त पौर्णिमा गायकवाड, सहायक पोलीस आयुक्त सुनील पवार, वरिष्ठ पोलीस निरीक्षक कृष्णा इंदलकर आणि पोलीस निरीक्षक (गुन्हे) विजय खोमणे यांच्या मार्गदर्शनाखाली तपास पथकातील पोलीस उपनिरीक्षक चंद्रकांत कामठे, पोलीस हवालदार कुंदन शिंदे, राजू जाधव, पोलीस अंमलदार विष्णु सुतार, पुरुषोत्तम गुन्ला, राहुल ओलेकर अक्षयकुमार वाबळे, शिवाजी क्षीरसागर, शरद राऊत, दयानंद तेलंगे पाटील, प्रमोद भोसले, अमित सुर्वे, भारत आस्मर तपास पथक कर्मचारी यांनी केली आहे.
