समर्थ पोलीस स्टेशनची कामगिरी : पुणे ग्रामीण राजगड पोलिसांनीही केली मदत
महाराष्ट्र ३६० न्यूज नेटवर्क
पुणे : चित्तथरारक पाठलाग करून सराईताच्या मुसक्या आवळण्यात तसेच दोन कार जप्त करण्यात समर्थ पोलीस स्टेशनला यश मिळाले असून, यासाठी त्यांना पुणे ग्रामीण राजगड पोलिसांनीही मदत केली.
सुतावरून स्वर्गात जाता येत नाही, तरी चोरटा चोरी केल्यानंतर छोटासा पुरावा सोडून जातो आणि त्याच तपासावरून पोलीस गुन्हेगारापर्यंत पोहोचत गुन्हेगाराला जेरबंद करण्यात यशस्वी होत आहेत. त्याच पद्धतीने तपास करून समर्थ पोलीस स्टेशनच्या अधिकारी-कर्मचाऱ्यांनी चित्तथरारक पाठलाग करीत तमिळनाडूतील सराईत वाहनचोराच्या समर्थ पोलिसांनी मुसक्या आवळल्या. त्याच्याकडून दोन कार व इतर साहित्य जप्त केले. यासाठी पुणे ग्रामीणच्या राजगड पोलिसांनीही मोलाची मदत केली आहे.
मनीकंदन सुबय्या नायडू (वय ४९, रा. इरुद्धापुरम, पटयनकाल, कलकुलम, कन्याकुमारी, कुझीकोड, तमिळनाडू) असे सराईत वाहनचोराचे नाव आहे.
हुंडई सँट्रो कार व बोलेरो पिकअप रस्त्याच्या कडेला उभ्या केलेल्या वाहनांचा समर्थ पोलीस तपास करीत होते. सीसीटीव्ही फुटेज आणि सूत्रांकडून मिळालेल्या माहितीच्या आधारे चोरी करणारा तामिळनाडूतील सराईत लॉजमध्ये असल्याची माहिती सूत्रांकडून मिळाली. आरोपी मोबाईल लोकेशनवरून खेड शिवापूर येथे असल्याचे समजले. तत्काळ समर्थ पोलीस स्टेशनच्या तपासपथकाचे सहायक पोलीस निरीक्षक संदीप जोरे यांनी राजगड पोलीस स्टेशनचे सहायक पोलीस निरीक्षक मनोज नवसरे यांना माहिती देत सातारा रस्त्यावर वाहन ताब्यात घेण्यास सांगितले.
नवसारे यांनी सापळा रचून तत्काळ स्टाफ व वॉर्डन निंबाळकर यांच्या मदतीने संशयित सँट्रो कारसह ताब्यात घेतले. त्याच्याकडे अधिक तपास केला असता सँट्रो कार राजेवाडी, नाना पेठ, तर बोलेरो पिकअप नाना पेठेतून चोरी केल्याची कबुली दिली. त्याच्याकडून दोन चार चाकी गाड्या जप्त केल्या असून, इतर साहित्य जप्त करण्यात आले आहे. पुणे ग्रामीणच्या राजगड पोलीस स्टेशनचे प्रभारी पोलीस निरीक्षक सचिन पाटील व त्यांच्या स्टाफचे मोठे सहकार्य लाभले. पुढील तपास समर्थ पोलीस स्टेशनचे पोलीस हवालदार संतोष काळे व सुशील लोणकर करीत आहेत.
सदरची कामगिरी ही, अपर पोलीस आयुक्त नामदेव चव्हाण, पोलीस उपायुक्त प्रियंका नारनवरे, सहायक पोलीस आयुक्त सतीष गोवेकर, समर्थ पोलीस स्टेशनचे वरिष्ठ पोलीस निरीक्षक विष्णू ताम्हाणे, पोलीस निरीक्षक उल्हास कदम यांच्या मार्गदर्शनाखाली तपासपथकाचे सहायक पोलीस निरीक्षक संदीप जोरे, सहायक पोलीस उपनिरीक्षक सतीश भालेराव, पोलीस हवालदार संतोष काळे, सुशील लोणकर, सुभाष पिंगळे, विठ्ठल चोरमले, शुभम देसाई, महेश जाधव, हेमंत पेरणे, सुभाष मोरे, नीलेश साबळे, श्याम सूर्यवंशी यांच्या पथकाने केली.
