पुण्याच्या कर्वेनगर परिसरात प्रचंड खळबळ : सीसीटीव्हीच्या माध्यमातून तपासकार्य सुरू
महाराष्ट्र ३६० न्यूज नेटवर्क
पुणे : कर्वेनगर परिसरात भरदिवसा एका 20 वर्षीय युवकाचा तलवारीने सपासप वार करून खून झाल्याची खळबळजनक घटना घडली आहे. ही घटना रविवारी (दि. 26) सायंकाळी साडेपाच वाजण्याच्या सुमारास घडली. अलंकार पोलिस ठाण्याच्या हद्दीतील चितळे लेनजवळ रक्ताच्या थारोळयात तरूण पडला होता. त्यास तातडीने रूग्णालयाकडे रवाना करण्यात आले आहे. वरिष्ठ पोलिस अधिकाऱ्यांसह गुन्हे शाखेच्या पोलिस अधिकाऱ्यांनी घटनास्थळी धाव घेतली.
पोलिसांनी सांगितले की, अनिल राजेंद्र जाधव नावाच्या 20 वर्षीय तरूणाचा भरदिवसा तलवारीने सपासप वार करून खून झाला आहे. अनिलची बहिण कर्वेनगर परिसरातील फक्कड हॉटेलमध्ये स्वयंपाकाचे काम करते. तो तिला सोडण्यासाठी आला असताना ही घटना घडली आहे अशी प्राथमिक माहिती समोर येत आहे.
अनिल जाधव याच्यावर तिघांनी तलवारीने सपासप वार केले आणि काही क्षणातच तो रक्ताच्या थारोळयात पडला. जागेवरच त्याचा मृत्यू झाल्याची माहिती समोर येत आहे. दरम्यान, याबाबत शहर नियंत्रण कक्षाशी संपर्क साधला असता त्यांनी काही वेळापुर्वीच खबर आली असल्याचे सांगितले. फक्कड हॉटेलमध्ये अनिल जाधवची बहिण स्वयंपाकाचे काम करते. तो तिला सोडण्यासाठी आला असता तिघांनी त्याच्या डोक्यावर आणि खांद्यावर तलवारीने सपासप वार केले. त्याचा जागेवरच मृत्यू झाला.
पोलिसांनी घटनेची माहिती मिळाल्यानंतर सिंहगड रोड विभागाचे सहाय्यक आयुक्त सुनिल पवार, पोलिस निरीक्षक (गुन्हे) संगिता पाटील, उपनिरीक्षक लहाने, उपनिरीक्षक सपताळे, कर्मचारी पवार, राठोड, गायकवाड, केकाण, गुन्हे शाखेचे अधिकारी आणि अलंकार पोलिस ठाण्याचे अधिकाऱ्यांनी घटनास्थळी धाव घेतली आहे. परिसरातील फुटेजमध्ये काही कैद झाले आहे काय हे देखील पोलिस तपासत आहेत. भरदिवसा पुण्यात 20 वर्षीय तरूणाचा खून झाल्याने प्रचंड खळबळ उडाली आहे. अनिल जाधवचा खून नेमक्या कोणत्या कारणामुळे झाला हे अद्याप स्पष्ट झालेले नाही.
Latest Articles
