स्थानिकांची उडाली तारांबळ : अग्निशमन दलाच्या जवानांमुळे टळली दुर्घटना
महाराष्ट्र ३६० न्यूज नेटवर्क
पुणे : हिंजवडी-माण रस्त्यावरील विद्युत डीपीवर चढून एका युवकाने आत्महत्येचा प्रयत्न केला असल्याची माहिती समोर आली आहे. दरम्यान अग्निशमन दलाच्या जवानांमुळे आत्महत्या करणा-या युवकाचा जीव वाचला आहे. त्या युवकाला उपचारासाठी जवळील खाजगी रुग्णालयात दाखल करण्यात आले आहे. ही घटना (सोमवारी) दुपारी 12.30 च्या सुमारास माण रस्त्यावरील वडजाई नगर येथे घडली.
उष्ण विद्युत तारांच्या संपर्कात आल्याने अज्ञात युवक काही प्रमाणात भाजला आहे. त्यामुळे त्या युवकाला तात्काळ खाजगी रुग्णालयात दाखल करण्यात आले आहे. या दरम्यान, विद्युत विभागाचे अधिकारीबरोबरच अग्निशमन विमोचक चंद्रशेखर मतकर, कर्मचारी दत्ता खेडेकर, प्रविण पिंगळे, निखिलेश शिवगन हे घटनास्थळी उपस्थित होते.
याबाबत माहिती अशी, अत्यंत वर्दळीच्या रस्त्यावर एक अज्ञात युवक दुपारच्या दरम्यान अचानक विद्युत डीपीवर चढल्याने स्थानिकांची मोठी तारांबळ उडाली. त्या दरम्यान तेथील नागरीकांनी MSEB च्या अधिकाऱ्यांना याबाबत माहिती कळवली. यानंतर तात्काळ विद्युत पुरवठा खंडीत करण्यात आला. अग्निशमन दलाच्या जवानांना याची माहिती समजताच जवान देखील घटनास्थळी दाखल झाले. त्यावेळी युवकाला खाली येण्याची विनंती केल्यानंतर तो खाली उडी मारण्याचा प्रयत्न करत होता. परंतु, आपल्या हिमतीने टप्पा क्रमांक एक मधील अग्निशमन दलाच्या जवानांनी संबधित युवकाला लोखंडी शिडीच्या सहाय्याने खाली उतरवले.
