पोलिसांचा धक्कादायक खुलासा : आरोग्य भरतीचा पेपर न्यासा कंपनीतूनही फुटला
महाराष्ट्र ३६० न्यूज नेटवर्क
पुणे : राज्यात सध्या अनेक पेपरफुटी प्रकरणे समोर येत आहेत. अशातच आरोग्य भरती प्रकरणात पुणे सायबर पोलिसांनी केलेल्या तपासात आणखी एक धक्कादायक माहिती समोर आली आहे. आरोग्य भरती परीक्षेचा पेपर परीक्षेपूर्वीच फुटल्याचे समोर आले आहे. आरोग्य विभागाची परीक्षा घेणाऱ्या न्यासा कंपनीतूनच पेपर फुटल्याचे उघड झाले आहे. याप्रकरणी दोन एजंटना पुणे पोलिसांनी अटक केल्याची माहिती पोलिस आयुक्त अमिताभ गुप्ता यांनी पत्रकार परिषदेत दिली.
निशीद रामहरी गायकवाड (वय-43 रा. 501 शेवळकर गार्डन, साऊथ अंबाझरी रोड, नागपूर मुळ रा. 52, आशियाड कॉलनी, शेगांव-रहाटगांव रोड, अमरावती) व त्याचा साथिदार राहुल धनराज लिंघोट (वय-35 रा. देवी पार्क, जावरकर लॉनच्या मागे, अमरवाती) अशी अटक करण्यात आलेल्या आरोपींची नावे आहेत. आरोपी निशीद गायकवाड याने परीक्षेपूर्वीच पेपरफोडून ते एजंटद्वारे परीक्षार्थींकडे दिल्याची माहिती सायबर पोलिसांना मिळाली होती. त्या अनुषंगाने तपास करुन पोलिसांनी दोघांना अटक केली आहे.
पेपरफुटीच्या दोन लिंक…
आरोग्य भरतीच्या पेपरफुटी प्रकरणी दोन लिंक समोर आल्या आहेत. पहिल्यांदा आरोग्य विभागाचा सह संचालक महेश बोटले, मुख्य प्रशासकी अधिकारी, आरोग्य विभाग लातूर प्रशांत बडगिरे, वैद्यकिय अधिकारी आरोग्य विभाग आंबाजोगाई डॉ. संदीप जोगदंड, राजेंद्र सानप यांना अटक करण्यात आली होती.
आता हा पेपर जिथून प्रिंट झाला तिथूनच फुटला असल्याचे समोर आल्याने खळबळ उडाली आहे. त्यामुळे या पेपरफुटीच्या दोन लिंक आतापर्यंत तपासात समोर आल्या आहेत. आतापर्यंत या प्रकरणात 18 आरोपींना अटक केली असून यामध्ये विभागातील अधिकारी, कर्मचारी, एजंट आणि काही परीक्षार्थींचा समावेश आहे. आरोपींनी 100 पैकी 92 प्रश्न परीक्षेपूर्वीच फोडले होते.
तुकाराम सुपेकडून रोख रक्कम, दागिने जप्त…
आरोग्य भरती पेपरफुटीचा तपास करत असताना पुणे सायबर पोलिसांना म्हाडा परीक्षेचा पेपर फुटणार असल्याची माहिती मिळाली. त्यानुसार पोलिसांनी तीन आरोपींना अटक केली. याच दरम्यान टीईटी परीक्षेचा पेपर फुटल्याची माहिती मिळाली. त्यानुसार तपास करुन पोलिसांनी परीक्षा परिषदेचे आयुक्त तुकाराम सुपे, शिक्षण विभागाचे सल्लागार अभिषेक सावरीकर यांना अटक केली. तुकाराम सुपे याच्या घरावर आणि कार्यालयावर छापा टाकून पोलिसांनी 3 कोटी 23 लाख 36 हजार 840 रुपये रोख आणि 67 लाख 78 हजार 800 रुपये किंमतीचे 150.5 तोळ्याचे सोन्याचे दागिने व इतर वस्तू जप्त केल्या आहेत. आतापर्यंत सुमारे 6 कोटीच्या जवळपास मुद्देमाल जप्त करण्यात आला आहे. आरोग्य, म्हाडा आणि टीईटी पेपरफुटी प्रकरणात आतापर्यंत एकुण 28 आरोपींना अटक करण्यात आलेली आहे. प्रकरणाचा तपास सायबर पोलिस करीत आहेत.
पोलीस आयुक्त अमिताभ गुप्ता, पोलीस सहआयुक्त डॉ. रविंद्र शिसवे, अपर पोलीस आयुक्त गुन्हे रामनाथ पोकळे, पोलीस उपायुक्त भाग्यश्री नवटके, सहायक पोलीस आयुक्त विजयकुमार पळसुले, पोलीस निरीक्षक डी.एस. हाके यांच्या मार्गदर्शनाखाली पोलीस निरीक्षक युनिट 4 जयंत राजूरकर करीत आहेत. या कारवाईत पोलीस निरीक्षक मिनल सुपे-पाटील, पोलीस उपनिरीक्षक अनिल डफळ, पोलीस अंमलदार राजकुमार जाबा, पुंडलीक, अश्वीन कुमकर, चालक सोनूने, शाहरुख शेख, श्रीकांत कबूले यांच्या पथकाने केली.
Latest Articles
