पुणे शहरात खळबळ : नातेवाईकांना मेसेज पाठवून आरोपी इंजिनिअर मुलाची आत्महत्या
महाराष्ट्र ३६० न्यूज नेटवर्क
पुणे : 76 वर्षाच्या आईला औषधांचा ओव्हर डोस देत त्यांचा चेहरा प्लॅस्टिक पिशवीत घालून त्यांचा खून केला. त्यानंतर इंजिनिअर तरुणाने गळफास घेऊन आत्महत्या केल्याचा धक्कादायक प्रकार समोर आला आहे. आत्महत्या करण्यापूर्वी तरुणाने नातेवाईकांना मेसेज पाठवला होता. यानंतर हा प्रकार उघडकीस आला आहे. या घटनेने शहरात एकच खळबळ उडाली आहे.
गणेश मनोहर फरताडे (वय 42) आणि त्याची आई निर्मला मनोहर फरताडे (वय 76, रा. अक्षय गार्डन सोसायटी, धनकवडी) असे या दोघांची नावे आहेत. याप्रकरणी गणेश याच्या मावस बहिणीने सहकारनगर पोलीस ठाण्यात फिर्याद दिली आहे.
पोलिसांनी सांगितले की, गणेश फरताडे व आई निर्मला फरताडे हे दोघे धनकवडीमध्ये राहत होते. गणेश हा इंजिनिअर होता. त्याची नोकरी गेली होती. 5 वर्षापूर्वी त्याच्या वडिलांचे आजारपणामुळे निधन झाले होते. त्यांच्या आजारपणात खूप पैसे खर्च झाले होते. तसेच त्याच्या आईला देखील अनेक व्याधी होत्या. त्यावर पैसे खर्च होत होते. आईचा औषधाचा खर्च आणि कामधंदा नसल्याने तो कर्जबाजारी झाला होता. याच नैराश्येत गणेश होता यातूनच त्याने आत्महत्या करण्याचा निर्णय घेतला.
आपल्या मागे आईचे कोण पाहणार असा प्रश्न त्याला पडला होता. या कारणावरुन त्याने आईला औषधाचा ओव्हर डोस दिला. ती निपचित पडल्यावर तिच्या चेहर्यावर प्लॅस्टिकची पिशवी घालून गळ्यास पांढर्या रंगाच्या दोरीने घट्ट बांधून तिचा खून केला. आत्महत्या करण्यापूर्वी त्याने 2 वाजून 10 मिनिटांनी मेसेज केला. आपण बेरोजगार आणि कर्ज बाजारी झाल्याने आत्महत्या करीत आहोत, असा मेसेज त्याने नातेवाईकांना पाठविला. त्यानंतर तो घराच्या छतावर गेला. तेथील लोखंडी हुकाला नायलॉनची दोरी बांधून त्याने गळफास घेऊन आत्महत्या केली. गणेशने पाठवलेला मेसेज त्याच्या नातेवाईकांनी सकाळी पाहिला. त्यानंतर त्यांनी याची माहिती सहकारनगर पोलिसांना दिली.
या घटनेची माहिती मिळाल्यानंतर सहकारनगर पोलिसांनी घटनास्थळी धाव घेतली. पोलिसांनी मावस बहिणीच्या फिर्यादीवरुन खुनाच्या गुन्ह्याची नोंद केली असून, पोलीस निरीक्षक मुलाणी अधिक तपास करीत आहेत.
Latest Articles
