पोलीस आयुक्तांचा आदेश : एमपीडीए कायद्यान्वये मागिल वर्षभरातील ५३ वी कारवाई
महाराष्ट्र ३६० न्यूज नेटवर्क
पुणे : विमानतळ पोलीस स्टेशन हद्दीमध्ये दहशत पसरविणाऱ्या अट्टल गु्न्हेगारावर एमपीडीए कायद्यान्वये स्थानबद्धतेची कारवाई करण्यात आली. एक वर्षासाठी औरंगाबाद मध्यवर्ती कारागृहामध्ये स्थानबद्ध करण्याचा आदेश पारित केला आहे. मागिल वर्षभरातील स्थानबद्धतेची ५३वी कारवाई आहे.
अरबाज आयुब पटेल (वय २३, रा. लेन.नं.४, वडगावशेरी, पुणे) असे स्थानबद्ध करण्यात आलेल्याचे नाव आहे.
अरबाज पटेल हा सराईत गुन्हेगार असून, साथीदारासह त्याच्यावर विमानतळ पोलीस स्टेशन हद्दीमध्ये कोयता, तलवारी सारख्या हत्यारासह खुनाचा प्रयत्न, गंभीर दुखापत, दंगा, बेकायदेशीर हत्यार बाळगणे अशा स्वरूपाचे पाच वर्षात पाच गुन्हे दाखल आहेत. त्याच्या गुन्हेगारी कृत्यामुळे परिसरातील सार्वजनिक सुव्यवस्थेला बाधा निर्माण झाली होती. त्याच्या दहशतीमुळे कोणी तक्रार देण्यासाठी पुढे येत नव्हते. प्राप्त प्रस्ताव व कागदपत्राची पडताळणी करून पोलीस आयुक्तांनी एमपीडीए कायद्यान्वये औरंगाबाद मध्यवर्ती कारागृह येथे एक वर्षासाठी स्थानबद्ध करण्याचा आदेश पारित केला.
विमानतळ पोलीस स्टेशनचे वरिष्ठ पोलीस निरीक्षक भरत जाधव, पीसीबी गुन्हे शाखेच्या वरिष्ठ पोलीस निरीक्षिका वैशाली चांदगुडे यांनी ही कामगिरी केली.
दहशत निर्माण करणाऱ्या व सक्रीय अट्टल गुन्हेगारांवर कडक प्रतिबंधात्मक कारवाई करण्याचे पोलीस आयुक्तांनी धोरण अवलंबिले आहे. त्यानुसार मागिल वर्षामध्ये ५३ गुन्हेगारांवर एमपीडीए कायद्यान्वये कारवाई करून स्थानबद्ध केले आहे. गुन्हेगारांच्या कृत्यांना आळा घालण्यासाठी ही कारवाई प्रभावीपणे राबविण्यात येणार आहे.
