कोथरूड पोलिसांत फिर्याद : पोलिसांनी २४ तासांत आठजणांना ठोकल्या बेड्या
महाराष्ट्र ३६० न्यूज नेटवर्क
पुणे : कोथरुडमधून एका चार वर्षाच्या मुलाचे अपहरण झाल्याची तक्रार आईने पोलिसांकडे केली. घटनेचे गांभीर्य लक्षात घेऊन पोलिसांनी तपास सुरु केला असता फिर्यादी महिलेनेच एका मध्यस्थामार्फत चार वर्षाच्या मुलाला एक लाख रुपयांना विकल्याची माहिती समोर आली. एवढेच नाही, तर महिलेने ज्या व्यक्तीला मुलाला विकले त्याने त्या मुलाला दुसऱ्या एका दाम्यत्याला एक लाख 60 हजार रुपयांना विकले. पोलिसांनी अवघ्या 24 तासांत गुन्ह्याचा उलगडा करुन 8 आरोपींना अटक केली आहे.
प्रियंका गणेश पवार, जन्नत बशीर शेख, रेश्मा सुतार, तुकाराम निंबळे, चंद्रकला माळी, भानुदास माळी, दीपक तुकाराम म्हात्रे आणि सीताबाई दीपक म्हात्रे अशी अटक करण्यात आलेल्या आरोपींची नावे आहेत. प्रियंका पवार हिने शुक्रवारी (दि.4) कोथरुड पोलीस ठाण्यात मुलाच्या अपहराणाची तक्रार दिली होती.
पोलिसांनी दिलेल्या माहितीनुसार, प्रियंका पवार या महिलेने चार वर्षाच्या मुलाचे अपहरण झाल्याची तक्रार कोथरुड पोलिसांकडे केली. तक्रार दाखल होताच कोथरुड, वारजे आणि उत्तमनगर पोलीस ठाण्यातील 9 पथके तयार करुन मुलाचा शोध सुरु केला. दरम्यान अपहरण झालेला मुलगा दुपारच्या वेळी याच परिसरात राहणारे बांगडेवाली भाभीसोबत होता, अशी माहिती पोलिसांना मिळाली. मिळालेल्या माहितीवरुन पोलिसांनी जन्नत बशीर शेख (रा. जळकेवस्ती, कोथरुड) हिला ताब्यात घेऊन सखोल चौकशी केली.
सुरुवातीला जन्नत शेखने पोलिसांना उडवा उडवीची उत्तरे दिली. त्यावेळी पोलीस नाईक आकाश वाल्मीकी व पोलीस नाईक विशाल चौगुले यांनी सीसीटीव्ही फुटेज तपसाले असता एक महिला मुलाला घेऊन जात असल्याचे दिसले. आरोपी जन्नत शेख हिच्याकडे कसून चौकशी केली असता तिने गुन्ह्याची कबुली दिली. तिच्याकडे केलेल्या चौकशीत तिने रेश्मा सुतार आणि फिर्यादी प्रियंका पवार यांच्यासोबत संगनमत करुन कट रचून निल पवार (वय-4) याला मध्यस्थी तुकाराम निंबळे (रा. मु.पो. वारु ता. मावळ) याच्यामार्फत चंद्रकला माळी व भानुदास माळी (रा. मुपो बोर्लेगाव ता. पनवेल जि. रायगड) यांना एक लाख रुपयांना विकल्याचे निष्पन्न झाले.
दरम्यान, पोलिसांनी चंद्रकला माळी आणि भानुदास माळी यांना त्याब्यात घेऊन सखोल चौकशी केली. त्यावेळी त्यांनी दीपक म्हात्रे व सीताबाई म्हात्रे यांना 1 लाख 60 हजार रुपयात मुलाची विक्री केल्याची माहिती मिळाली. पोलिसांनी या सर्व आरोपींना अटक केली असून 9 फेब्रुवारीपर्यंत त्यांना पोलीस कोठडी मिळाली असून पोलीस तपास करीत आहेत.
पोलीस उपायुक्त पोर्णिमा गायकवाड यांनी सांगितले की, आरोपी प्रियंका पवार ही पतीपासून विभक्त राहत असून, तिला दोन मुले आहेत. दुसरा मुलगा एक वर्षाचा आहे. दोन्ही मुलांचा सांभाळ करणे अशक्य असल्याने तिने चार वर्षाच्या मुलाला जन्नत शेख, रेश्मा सुतार यांच्या मदतीने मध्यस्थी तुकाराम निंबळे याच्या मार्फत मुलाची विक्री केली. पोलिसांनी म्हात्रे दांपत्याकडून मुलाची सुटका करुन गुन्ह्यातील 1 लाख 81 हजार रुपयांची रक्कम जप्त केली. मुलाला त्याच्या वडिलांकडे सोपवण्यात आले आहे.
पोलीस आयुक्त अमिताभ गुप्ता, पोलीस सहआयुक्त डॉ. रविंद्र शिसवे, पोलीस उपायुक्त पौर्णिमा गायकवाड, सहायक पोलीस आयुक्त रुक्मिनी गलांडे यांच्या मार्गदर्शनाखाली कोथरुड पोलीस ठाण्याचे वरिष्ठ पोलीस निरीक्षक महेंद्र जगताप, वारजे पोलीस ठाण्याचे वरिष्ठ पोलीस निरीक्षक शंकर खटके, उत्तमनगर पोलीस ठाण्याचे सनिल जैतापूरकर, सहायक पोलीस निरीक्षक बाळासाहेब बडे, महिला सहायक पोलीस निरीक्षक वृषाली पाटील, आरती खेतमाळीस, महिला पोलीस उपनिरीक्षक काजोल यादव, किसन राठोड, रतिकांत कोळी, विक्रम पवार, नागराज बिराजदार, चैतन्य काटकर, क्षिरसागर सर्व कोथरुड पोलीस स्टेशन, उत्तमनगर पोलीस ठाण्याचे सहायक पोलीस निरीक्षक पवार पोलीस उपनिरीक्षक मुंडे यांच्यासह उत्तमनगर, वारजे आणि कोथरुड पोलीस ठाण्यातील पोलिसांनी ही दमदार कारवाई केली.
