पुणे ग्रामीण पोलिसांनी केली होती एमपीडीएअंतर्गत कारवाई : उर्से टोल नाका प्रकरण
महाराष्ट्र ३६० न्यूज नेटवर्क
पुणे : एमपीडीए कायद्यांतर्गत पुण्यातील कुख्यात गजानन मारणे याची नागपूर कारागृहात रवानगी करण्यात आली होती. पुणे ग्रामीण पोलिसांनी गजानन मारणे याच्यावर एमपीडीए अंतर्गत कारवाई केली होती. त्याची मुदत आज संपल्याने गजानन मारणे याची नागपूर कारागृहातून सुटका करण्यात आल्याची माहिती अ‍ॅड. विजयसिंह ठोंबरे यांनी दिली. गजानन मारणे याला सुरुवातीला येरवडा कारागृहात स्थानबद्ध करण्यात आले होते. त्यानंतर त्याची रवानगी नागपूर कारागृहात करण्यात आली होती.
कुख्यात गुंड गजानन मारणेची दोन खून खटल्यातून मुक्तता झाल्यानंतर त्याच्यावर आणखी खटले नसल्याने त्याची तळोजा कारागृहातून सुटका करण्यात आली. कारागृहातून बाहेर येताच कुख्यात गुंड गजानन मारणे टोळीने बेकायदा जमाव जमवून फटाके वाजवले. तसेच आरडाओरडा करुन दहशत निर्माण केली. हा प्रकार मुंबई-पुणे द्रुतगती मार्गावर उर्से टोल नाका येथे घडला. याप्रकरणी मारणेसह त्याच्या साथीदारांवर पुणे, पिंपरी-चिंचवड आणि पुणे ग्रामीण पोलिसांत वेगवेगळ्या ठिकाणी गुन्हे दाखल करण्यात आले होते.
खून खटल्यात मुक्तता मिळाल्यानंतर गजानन मारणे याची तळोजा कारागृहातून सुटका करण्यात आली. त्याचे स्वागत करण्यासाठी कारागृहाबाहेर त्याचे हजारो समर्थक उपस्थित होते. त्यांनी महाराष्ट्राचा किंग असे स्टेटस टाकत त्याची एक्सप्रेस हायवेवरुन जंगी मिरवणुक काढली. यामध्ये 500 हून अधिक चारचाकी गाड्या सहभागी झाल्या होत्या. पप्पू गावडे आणि अमोल बधे खून प्रकरणात 2014 मध्ये गजानन मारणे व त्याच्या समर्थकांवर मोक्का अंतर्गत कारवाई करण्यात आली होती. तेव्हापासून मारणे तुरुंगात होता. मात्र, न्यायालयाने निर्दोष मुक्तता केल्यानंतर मारणे जेलबाहेर आला होता. तब्बल 8 वर्षांनी पुन्हा गजानन मारणे जेलबाहेर असणार आहे.
