दारूबंदी, जुगारबंदी, गुन्हेगारांवर धडक कारवाई : ४ जणांना हद्दपार, ४७ जणांना तात्पुरता बंदोबस्त
महाराष्ट्र न्यूज नेटवर्क
बार्शी : बार्शी नगरपालिका सार्वत्रिक निवडणूक २०२५ शांततेत व सुरळीत पार पडावी, तसेच कोणत्याही प्रकारचा अडथळा निर्माण होऊ नये, यासाठी बार्शी शहर पोलीस ठाण्याकडून विविध प्रतिबंधात्मक कारवाया करण्यात आल्या आहेत.
निवडणुकीच्या अनुषंगाने बार्शी शहर पोलीस ठाण्याने महाराष्ट्र जुगारबंदी अधिनियमांतर्गत १२ आणि महाराष्ट्र दारूबंदी अधिनियमांतर्गत २१ गुन्हे नोंदवले आहेत. तसेच सतत दारू विक्री करणाऱ्या २० जणांकडून महाराष्ट्र दारूबंदी अधिनियम कलम ९३ नुसार मा. उपविभागीय दंडाधिकारी यांच्या समक्ष अंतिम बंधपत्र लिहून घेण्यात आले आहे.
मा. जिल्हाधिकारी तसेच मा. पोलीस अधीक्षक यांच्या आदेशानुसार, शहरातील मागील पाच वर्षांत शरीराविरुद्ध गुन्हे दाखल असलेल्या आरोपींवर बी.एन.एस.एस. कलम १२६ अन्वये ४५३ आणि कलम १२९ अन्वये १५ जणांवर प्रतिबंधात्मक कारवाई करण्यात आली आहे.
यासोबतच उपविभागीय दंडाधिकारी, सोलापूर यांनी खालील चार आरोपींना पुढील सहा महिन्यांसाठी सोलापूर व धाराशिव जिल्ह्यातून हद्दपार करण्याचे आदेश दिले आहेत-
१) युन्नुस रज्जाक सय्यद, रा. मांगडे चाळ, बार्शी.
२) अक्षय पप्पू भवळ, रा. लहुजी वस्ताद चौक, बार्शी.
३) ओंकार उर्फ तुळया किशन पेठाडे, रा. टिळक चौक, बार्शी.
४) राजेंद्र भगवान गायकवाड, रा. १६९० लहुजी वस्ताद चौक, बार्शी.
तसेच मतदान प्रक्रिया शांततेत पार पडावी यासाठी ४७ जणांना दिनांक २८ नोव्हेंबर २०२५ ते ०३ डिसेंबर २०२५ या सहा दिवसांच्या कालावधीसाठी बार्शी शहरातून तात्पुरते हद्दपार करण्यात आले आहे. मात्र मतदानाच्या दिवशी मतदान करण्यासाठी आवश्यक वेळेत शहरात उपस्थित राहण्याची परवानगी त्यांना देण्यात आली आहे.
प्रशासनाने केलेल्या या कारवाया लक्षात घेता, शहरातील सर्व नागरिकांनी निवडणुकीदरम्यान कोणतेही भांडण–तंटे करू नयेत, कायदा हातात घेऊ नये आणि मतदान प्रक्रिया शांततेने पार पाडावी, असे आवाहन करण्यात आले आहे.
Latest Articles
