‘नोकरी घेण्यापेक्षा देणारे व्हा’, असा दिला प्रेरणादायी संदेश : जीवनकौशल्ये, प्रामाणिकपणा आणि सकारात्मकतेवर भर
महाराष्ट्र न्युज नेटवर्क
पुणे : सूर्यदत्त कॉलेज ऑफ फार्मसी, हेल्थकेअर अँड रिसर्च (SCPHR), बावधन येथे बी.फार्म व डी.फार्मच्या नवागत विद्यार्थ्यांसाठी तीन दिवसांचा इंडक्शन कार्यक्रम आयोजित करण्यात आला. आधुनिक फार्मसी क्षेत्रातील संधी, नैतिक मूल्ये आणि व्यावसायिक प्रामाणिकता याबाबत विद्यार्थ्यांना सर्वंकष मार्गदर्शन करण्यात आले.
सूर्यदत्त कॉलेज ऑफ फार्मसी, हेल्थकेअर अँड रिसर्च (SCPHR) यांच्या वतीने नव्याने प्रवेश घेतलेल्या विद्यार्थ्यांसाठी तीन दिवसीय इंडक्शन कार्यक्रम उत्साहात पार पडला. विद्यार्थ्यांना संस्थेची कार्यपद्धती, नियमावली, शैक्षणिक धोरणे, उद्योगातील अपेक्षा आणि फार्मसी क्षेत्रातील नव्या संधी यांविषयी मार्गदर्शन करणे हा या कार्यक्रमाचा मुख्य उद्देश होता.
कार्यक्रमात सूर्यदत्त ग्रुप ऑफ इन्स्टिट्यूशन्सचे संस्थापक अध्यक्ष प्रा. डॉ. संजय बी. चोरडिया यांनी विद्यार्थ्यांना प्रेरणादायी जीवनमंत्र दिले. “फार्मसी क्षेत्र सतत बदलत आहे; प्रामाणिकता, सातत्य आणि सकारात्मकता या मूल्यांसह आधुनिक कौशल्ये आत्मसात केल्यास विद्यार्थी यशाची खरी उंची गाठू शकतात.
नोकरी घेण्यापेक्षा देणारे बना, हाच यशस्वी जीवनाचा खरा कानमंत्र,” असा संदेश त्यांनी दिला. डॉ. चोरडिया यांनी विद्यार्थी जीवनातील चांगली संगत, दर्जेदार ज्ञान, आत्मविश्वास आणि पालकांशी प्रामाणिक राहण्याचे महत्त्व अधोरेखित केले.
कार्यक्रमात FDA पुणेचे निवृत्त सहाय्यक आयुक्त श्री. दिनेश खिनवसरा यांनी औषध नियमन, गुणवत्ता मानके आणि फार्मास्युटिकल स्टार्टअप्ससाठी आवश्यक कायदेशीर प्रक्रियेची सविस्तर माहिती दिली. तसेच IPER चे मानद संचालक डॉ. महेश बुरांडे यांनी “यशस्वी व्यक्ती वेगळे काम करत नाहीत, ते काम वेगळ्या पद्धतीने करतात” या विषयावर विद्यार्थ्यांना प्रेरित केले.
फार्मसी व्यवसायातील व्यावसायिक संधी, ग्राहकसेवा, करिअर मार्ग आणि इंडस्ट्रीतील अपेक्षा याबाबत श्री. प्रसन्न पाटील यांनी मार्गदर्शन केले. यानंतर स्लो ग्लोबल बिझनेस कम्युनिटीचे संस्थापक डॉ. दीपक तोष्णीवाल यांनी फार्मसीची जागतिक व्याप्ती, संशोधनाचे महत्त्व आणि उद्योजकतेतील संधी स्पष्ट केल्या.
समारोप सत्रात विद्यार्थ्यांनी कार्यक्रमाबद्दल उत्साहाने प्रतिक्रिया देत “आमची 2025–2029 बॅच सर्वोत्तम ठरेल,” असा आत्मविश्वास व्यक्त केला. या कार्यक्रमाचे प्रभावी आयोजन डॉ. प्रो. सारिका झांबड यांनी केले, तर दिपाली कुडले, अंकिता सरोदे आणि मोहिनी तहरे यांनी महत्त्वपूर्ण सहकार्य केले. विद्यार्थी घडविण्याच्या दिशेने प्रेरणा, व्यावसायिकता आणि स्टार्टअप संस्कृतीचा पाया घालणारा हा तीन दिवसांचा कार्यक्रम अत्यंत यशस्वी ठरला.
