आरोपीला तात्काळ अटक : बंडगार्डन पोलिसांची कारवाई
महाराष्ट्र न्यूज नेटवर्क : अभिजित डुंगरवाल
पुणे : पोलीस नियंत्रण कक्षाला कॉल करुन पुणे रेल्वे स्टेशन, शिवाजीनगर, पिंपरी चिंचवड रेल्वे स्टेशन, बांद्रा आणि गेटवे ऑफ इंडीया बॉम्बने उडवून देण्याची धमकी देणाऱ्या आरोपीला तात्काळ अटक करण्यात आली आहे.
प्रविण येशी (वय ३५ वर्षे व्यवसाय इलेक्ट्रीशन रा. गंगोत्री कॉम्पलेक्स, महादेवनगर, मांजरी रोड, हडपसर) याला अटक करण्यात आली आहे.
१६ फेब्रुवारी रोजी डायल ११२ नंबरवर अनोळखी व्यक्तीने त्याच्या मोबाईल नंबर वरुन फोन केला. व सायंकाळी ५ वा. पुणे रेल्वे स्टेशन, शिवाजीनगर, पिंपरी चिंचवड रेल्वे स्टेशन, बांद्रा आणि गेटवे ऑफ इंडीया बॉम्बने उडवुन देण्याची धमकी दिली.
सरकारी यंत्रणेला वेठीस धरले म्हणुन पोलीस नियंत्रण कक्ष, पुणे शहर येथील महिला पोलीस अंमलदार कल्पना घरजाळे यांनी बंडगार्डन पोलीस स्टेशन येथे तक्रार दिली. बंडगार्डन पोलीस स्टेशन येथे गुन्हा दाखल करुन या गुन्ह्याचा तपास पोलीस उप-निरीक्षक लोहार यांच्याकडे देण्यात आला.
यातील आरोपीच्या कॉलवरुन तात्काळ दखल घेऊन बंडगार्डन पोलीस स्टेशनकडुन बांद्रा आणि गेटवे ऑफ इंडीया मुंबई व पिंपरी चिंचवड रेल्वे स्टेशन, यांचा समावेश असल्याने तेथील पोलिस आयुक्तालय यांना तात्काळ कळवुन बी.डी.डी. एस. पथकाकडून पुणे रेल्वे स्टेशन व शिवाजीनगर परिसराची तपासणी करण्यात आली. परंतु संशयीत काही मिळुन आले नाही. तसेच यातील आरोपीचा शोध घेण्यासाठी तात्काळ २ पथके तयार केली. त्यांनी यातील आरोपीच्या मोबाईल नंबर वरुन आरोपीचा हडपसर पोलीस स्टेशनच्या स्टाफच्या मदतीने शोध घेतला असता आरोपी याला १७ फेब्रुवारी रोजी अटक करण्यात आलेली आहे.
त्याच्याकडे प्रथमदर्शनी केलेल्या तपासामध्ये त्याने केलेले कृत्य हे कौटुंबीक कलहातुन आलेल्या नैराश्यामधुन केल्याचे सांगीतले आहे. या आरोपीस न्यायालयामध्ये हजर करुन त्याची पोलीस कस्टडी रिमांड घेऊन आणखी सखोल तपास बंडगार्डन पोलीस करीत आहेत.
ही कारवाई पोलीस आयुक्त अमितेश कुमार, पोलीस सहआयुक्त प्रविण पवार, अप्पर पोलीस आयुक्त, पश्चिम प्रादेशिक विभाग पुणे प्रविणकुमार पाटील, पोलीस उपआयुक्त परिमंडळ २ स्मार्तना पाटील, सहायक पोलीस आयुक्त, लष्कर विभाग संजय सुर्वे, बंडगार्डन पोलीस स्टेशनचे संदिपान पवार यांच्या मार्गदर्शनाखाली अंमलदार घडे, पुराणे व रोमण यांच्या पथकाने केली.
Latest Articles
