कोंढवा पोलिसांनी केली एकास अटक
महाराष्ट्र न्यूज नेटवर्क
पुणे : तयार केलेले जेवण न आवडल्याच्या कारणावरून बांधकाम मजुराच्या डोक्यात लोखंडी हातोडा मारून खून केल्याचा धक्कादायक प्रकार कोंढवा येथे घडला आहे. आरोपीने आणखी एकाच्या डोक्यात हातोडा मारल्याने तो गंभीर जखमी झाला, याप्रकरणी कोंढवा पोलिसांनी एकाला अटक केली.
महम्मदवाडीतील रहेजा मिलेनियम लेबर कॅम्पच्या मेसमध्ये ही घटना घडली. भुवन सस्तिक सरकार (वय ६३, रा. पश्चिम बंगाल) असे खून झालेल्याचे नाव आहे. याप्रकरणी कमल नारायण मारडी (वय ४९, रा. जियापूर, पश्चिम बंगाल) याला अटक करण्यात आली.
रविवारी दुपारी भुवन सरकार यांनी जेवण तयार केले होते. पण ते न आवडल्याने मारडीने शिवीगाळ करत त्याच्या डोक्यात हातोडा मारला. यात सरकार गंभीर जखमी झाला. या घटनेची माहिती मिळताच पोलिसांनी घटनास्थळी धाव घेतली.
सरकार यांना तातडीने रुग्णालयात दाखल करण्यात आले. उपचारादरम्यान त्यांचा मृत्यू झाला. हा तपास सहा. पो. निरी. अमित शेटे करीत आहेत.
