पुणे शहराच्या बांधकाम व्यावसायिकांना दिलासा
महाराष्ट्र न्यूज नेटवर्क
पुणे : पुणे शहराच्या बांधकाम व्यावसायिकांना दिलासा देणारे वातावरण सध्या दिसत आहे. पुण्याच्या निवासी क्षेत्रात वर्ष २०२४ च्या जानेवारी ते जुलै पर्यंतच्या कालावधीमध्ये १,१३,२७७ घरांच्या विक्रीची नोंदणी झाली असून, २०२३ मध्ये एक लाखांचा टप्पा सप्टेंबरमध्ये ओलांडला गेला होता. त्या तुलनेत या वर्षों अधिक वेगवान वाढ झाली आहे. असे नाइट फ्रैंक इंडियाने आपल्या ताज्या अहवालात म्हटले आहे.
विक्रीतील वाढही याच कालावधीच्या तुलनेत ४५ % असून, या नोंदणीमधून मुद्रांक शुल्क संकलनातही ४७ % वाढ झाली आहे. सात महिन्यांतील एकूण मुद्रांक शुल्क संकलनाने ४१२७ कोटी रुपयांचा टप्पा ओलांडला आहे, असेही अहवालात म्हटले आहे.
जुलै महिन्यात शहरात १३,३१४ मालमत्तांची विक्री नोंदणी झाली असून, पहिल्या सात महिन्यांतच एक लाखाहून अधिक घरांची विक्री झाली. जुलैमध्ये हा टप्पा पार करून घरांच्या विक्रीतील गेल्या दोन वर्षांतील सर्वांत वेगवान वाढ नोंदवली आहे.
पुण्यातील गृह खरेदी दारांमधील वाढता आत्मविश्वास, परवडणारी क्षमता आणि मालमत्तेच्या मालकीबाबतचा सकारात्मक दृष्टीकोन दिसून येत आहे. मागील वर्षांच्या याच वेळेच्या तुलनेत त्यात २५ % वाढ झाली आहे. जुलै महिन्यात एकूण ५०४ कोटी रुपये मुद्रांक शुल्क संकलन झाले असून, त्यात वार्षिक ४७ % वाढ झालो आहे.
मुख्यतः मध्यम श्रेणी आणि आलिशान घरांच्या वाढत्या मागणीमुळे या महिन्यात घरांच्या नोंदणीतही वार्षिक २३ % वाढ झाली आहे. घरांच्या नोंदणीत ५० लाख ते १ कोटी रुपयांच्या श्रेणीत सर्वाधिक ३३ % नोंदणी झाली आहे.
जुलै महिन्यात पायाभूत सुविधांमधील सुधारणा आणि आर्थिक प्रगतीमुळे खरेदीला चालना मिळाली असून, निवासी क्षेत्राची भरभराट होत आहे. ही वाढ भविष्यातील वाढीचे संकेत देत आहे. अशी माहिती (अध्यक्ष व व्यवस्थापकीय संचालक, नाइट फेंक इंडिया) शिशिर बैजल यांनी दिली.
