हडपसर पोलिस स्टेशनमध्ये गुन्हा दाखल
महाराष्ट्र न्यूज नेटवर्क
पुणे : दारूच्या नशेत रिक्षा भरधाव चालवून महिलेचा चिरडल्याची घटना घडली आहे. या अपघातात महिलेचा मृत्यू झाला. ही घटना २५ ऑगस्ट रोजी शेवाळवाडी भाजी मार्केटच्या समोर घडली. याप्रकरणी हडपसर पोलिसांनी रिक्षा चालकाला अटक केली आहे.
सारिका राजेंद्र चव्हाण (वय ३८, रा. लोणी काळभोर) असे अपघातात मृत्युमुखी पडलेल्या महिलेचे नाव आहे. याप्रकरणी अमोल सज्जन कानगुडे (वय ३६, रा. वाडगे वस्ती, लोणी काळभोर) यांनी हडपसर पोलिस ठाण्यात तक्रार दिली आहे.
तक्रारीनुसार आनंद रवींद्र दोडके (वय ४०, रा. हिंगणे मळा, हडपसर) याला अटक करण्यात आली आहे. अधिक माहितीनुसार, आरोपी रिक्षाचालक आनंद दोडके हा दारूच्या नशेत रिक्षा भरधाव चालवत हडपसर येथून लोणीकडे जात होता.
शेवाळवाडी येथे भाजीविक्री करणाऱ्या सारिका चव्हाण यांना जोराची धडक दिली. यात सारिका यांना गंभीर दुखापत झाली आणि त्यांचे मेंदूला मार लागला. गंभीर जखमी अवस्थेत त्यांना रुग्णालयात दाखल केले असता डॉक्टरांनी त्यांना मृत घोषित केले, असे फिर्यादीत नमूद केले आहे. याप्रकरणाचा पुढील तपास पोलिस उपनिरीक्षक गांधले करत आहेत.
