रु. १२,५०,०००/- किमतीच्या २४ दुचाकी जप्त : हडपसर पोलिसांची कामगिरी
महाराष्ट्र न्यूज नेटवर्क
पुणे : पुणे शहरातून दुचाकी चोरणाऱ्या अट्टल वाहनचोरास हडपसर पोलिसांनी अटक केली असून, त्याच्याकडून तब्बल रु. १२,५०,०००/- किमतीच्या २४ दुचाकी हस्तगत करण्यात पोलिसांना यश मिळाले आहे.
पोलीस आयुक्त, पुणे शहर यांनी पुण्यात वाहनचोरीच्या गुन्ह्यांचे प्रमाण वाढत असल्याचे लक्षात घेऊन कारवाई करण्याच्या सूचना दिल्या होत्या. तसेच पोलीस उपायुक्त, परिमंडळ ५, आर. राजा, यांनी हडपसर पोलीस ठाण्यात अधिकारी व कर्मचाऱ्यांची बैठक घेतली आणि वाहनचोरीचे गुन्हे उघडकीस आणण्यासाठी योग्य ती कार्यवाही करण्याच्या सूचना दिल्या.
वरिष्ठांच्या सूचनांनुसार वरिष्ठ पोलीस निरीक्षक, हडपसर पोलीस स्टेशन, पुणे शहर, संतोष पांढरे यांनी तपास पथकातील अधिकारी व अंमलदारांची बैठक घेऊन वाहनचोरीचे गुन्हे उघड करण्यासाठी आराखडा तयार केला.
त्यानुसार, तपास पथक अधिकारी सहायक पोलीस निरीक्षक अर्जुन कुदळे, पोलीस उपनिरीक्षक महेश कवळे, पोलीस अंमलदार दिपक कांबळे, चंद्रकांत रेजितवाड, अजित मदने, कुंडलीक केसकर असे अधिकारी हडपसर पोलीस ठाण्याच्या हद्दीत वाहनचोरी प्रतिबंधक पेट्रोलिंग करत होते.
पोलीस अंमलदार दिपक कांबळे आणि चंद्रकांत रेजितवाड यांना मिळालेल्या गोपनीय माहितीवरून आरोपी दिपक उर्फ जोजो बाबुराव सरवदे (वय ३०, रा. थोरात वस्ती, द्वारका मेडीकल समोर, कोलवडी रोड, मांजरी, पुणे) यास ताब्यात घेतले. त्याच्याकडे केलेल्या तपासात त्याने मांजरी, मुंढवा, लोणीकाळभोर, लोणीकंद या भागांतून वेळोवेळी दुचाकी चोरी केल्याचे निष्पन्न झाले आहे. त्याच्यावर यापूर्वीही पुणे शहरात मोटारसायकल चोरीचे अनेक गुन्हे दाखल आहेत.
आरोपीकडून आजपर्यंत एकूण २४ गुन्हे उघडकीस आले असून, रु. १२,५०,०००/- किमतीचा माल जप्त करण्यात आला आहे. त्यात ९ होंडा शाईन, ४ हिरोहोंडा पॅशन, ४ स्प्लेंडर, २ हिरो होंडा डिलक्स, २ अॅक्टिवा, १ अवेंजर, १ होंडा डिओ, १ होंडा ड्रीम युगा अशा २४ दुचाकी जप्त करण्यात आल्या आहेत.
या दुचाकी पुणे शहर, धाराशिव, आणि लातूर या ठिकाणांहून हस्तगत करण्यात आल्या आहेत. हडपसर पोलीस ठाणे हद्दीतील १९, मुंढवा पोलीस ठाण्यातील २, लोणीकंद पोलीस ठाण्यातील २ आणि लोणीकाळभोर पोलीस ठाण्यातील १ असे एकूण २४ गुन्हे उघडकीस आले आहेत.
ही कामगिरी वरिष्ठ पोलीस निरीक्षक संतोष पांढरे यांच्या मार्गदर्शनाखाली, पोलीस निरीक्षक (गुन्हे) निलेश जगदाळे यांच्या सूचनेनुसार, तपास पथकाचे सहाय्यक पोलीस निरीक्षक अर्जुन कुदळे, पोलीस उपनिरीक्षक महेश कवळे आणि पोलीस अंमलदार दिपक कांबळे, चंद्रकांत रेजितवाड, सुशील लोणकर, संदीप राठोड, ज्योतीबा पवार, समीर पांडुळे, सचिन जाधव, निलेश किरवे, प्रशांत दुधाळ, निखील पवार, भगवान हंबर्डे, अजित मदने, अतुल पंधरकर, अमित साखरे, अमोल दणके, कुंडलीक केसकर, तुकाराम झुंजार, अभिजीत राऊत यांच्या पथकाने केली आहे.
