पुणे महापालिका आयुक्तांनी दिला आदेश
महाराष्ट्र न्यूज नेटवर्क
पुणे : उरुळी देवाची – फुरसुंगी कचरा डेपोतील जैविक उत्खननाच्या (बायोमायनिंग) निविदा प्रकरणाची महापालिका अतिरिक्त आयुक्तांनी चौकशी करावी, आणि या निविदेतील आर्थिक बाबींसंदर्भात मुख्य लेखा परीक्षकांनी अहवाल सादर करावा, असा आदेश पुणे महापालिकेचे आयुक्त डॉ. राजेंद्र भोसले यांनी दिला आहे.
पुणे महापालिकेच्या घनकचरा विभागातर्फे बायोमायनिंगची निविदा काढण्यात आली होती. या बायोमायनिंगच्या निविदा, यापूर्वी दिलेली बिले, तसेच सध्या अस्तित्वात असलेल्या कचऱ्यात माती किती व कचरा किती आहे याची तपासणी करावी, अशी मागणी शहर काँग्रेसच्या व्यापारी सेलचे अध्यक्ष भरत सुराणा यांनी केली आहे.
यासंदर्भात त्यांनी महापालिका भवनासमोर दोन दिवसांपासून उपोषण सुरू केले होते. यावर मंगळवारी (ता. ८) रात्री महापालिका आयुक्तांच्या दालनात बैठक झाली. या बैठकीत सुराणा व प्रदेश काँग्रेसचे उपाध्यक्ष मोहन जोशी यांच्यासोबत चर्चा झाली.
आयुक्त डॉ. भोसले म्हणाले, “उपोषणकर्त्यांनी उपस्थित केलेल्या मुद्द्यांवर चौकशी करण्याचे निर्देश दिले आहेत. तसेच जुन्या बिलांची मुख्य लेखा परीक्षकांकडून तपासणी करून अहवाल सादर करण्याचे आदेश दिले आहेत.” भरत सुराणा म्हणाले, “महापालिका आयुक्तांनी या संदर्भात चौकशीचे आदेश दिल्यामुळे उपोषण मागे घेतले आहे. योग्य पद्धतीने चौकशी न झाल्यास पुन्हा आंदोलन केले जाईल.”
Latest Articles
