महाराष्ट्र न्यूज नेटवर्क
पुणे : पूना हॉस्पिटल अँड रिसर्च सेंटर मागील चार दशकांपासून अत्याधुनिक व वाजवी दरात वैद्यकीय सेवा पुरवण्याचे काम करत आहे. हीच परंपरा कायम ठेवत, पूना हॉस्पिटलमध्ये दसऱ्याच्या शुभ मुहूर्तावर ‘डिपार्टमेंट ऑफ होमिओपॅथी’ आणि ‘नवीन आयुर्वेद ओपीडी’ यांचे उद्घाटन राष्ट्रीय संशोधन प्राध्यापक (AYUSH आणि सावित्रीबाई फुले पुणे विद्यापीठ) डॉ. भूषण पटवर्धन यांच्या हस्ते करण्यात आले.
नव्याने सुरू करण्यात आलेल्या होमिओपॅथी विभागाद्वारे वरिष्ठ डॉक्टरांकडून होमिओपॅथिक सल्ला व उपचार दिले जातील. तसेच, नवीन आयुर्वेद ओपीडी द्वारे प्राचीन आयुर्वेद तत्त्वांवर आधारित तज्ञ आयुर्वेदिक सल्ला व उपचाराद्वारे रुग्णांचे आरोग्य सुधारण्याचे प्रयत्न केले जातील.
कार्यक्रमात पूना हॉस्पिटलचे अध्यक्ष देवीचंद जैन यांनी डॉ. भूषण पटवर्धन यांचा सत्कार केला. मॅनेजिंग ट्रस्टी राजकुमार चोरडिया यांनी प्रास्ताविक केले. डॉ. भूषण पटवर्धन यांनी रुग्णालयात इतर मोठ्या विभागांबरोबरच आयुर्वेद विभाग सुरू करून पूना हॉस्पिटलने एक नवीन आदर्श घालून दिला असल्याचे सांगितले.
तसेच या वैकल्पिक औषधांचा प्रचार करण्याच्या रुग्णालयाच्या प्रयत्नांचे कौतुक केले. त्यांनी या पारंपरिक आणि आधुनिक आरोग्यसेवा पद्धतींमुळे रुग्णांना अधिक व्यापक प्रमाणात फायदा होईल, आणि आज इतर हॉस्पिटल्सच्या तुलनेत पूना हॉस्पिटल हे खऱ्या अर्थाने समाजातील प्रत्येक स्तरातील माणसांसाठी तितक्याच तत्परतेने कार्यरत आहे, असे नमूद केले.
समारंभाच्या व्यासपीठावर रुग्णालयाचे अध्यक्ष देवीचंद जैन, मॅनेजिंग ट्रस्टी राजकुमार चोरडिया, जॉईंट मॅनेजिंग ट्रस्टी पुरुषोत्तम लोहिया, विश्वस्त राजेश शाह, नैनेश नंदू, सुजय शाह, पूना हॉस्पिटलचे सीईओ डॉ. रवींद्रनाथ, तसेच पूना हॉस्पिटलचे डॉक्टर उपस्थित होते. पूना हॉस्पिटलचे विश्वस्त राजेश शाह यांनी आभार मानले.
