पिस्टल घेऊन फिरताना पकडले, वारजे माळवाडी पोलिसांची कामगिरी
महाराष्ट्र न्यूज नेटवर्क : अभिजित डुंगरवाल
पुणे : देशी बनावटीच्या २ पिस्टलसह ४ जिवंत राऊंड व एक महिंद्रा थारगाडी घेऊन फिरणाऱ्या युवकांना वारजे माळवाडी पोलिसांनी अटक केली आहे. त्यांच्याकडून १५ लाख ६० हजार रुपयांचा मुद्देमाल जप्त करण्यात आला आहे. अनिरुद्ध ऊर्फ विकी बाळु जाधव हा पिंपरी चिंववड भागातील रावण टोळीचा म्होरक्या असल्याचे समोर आले.
या प्रकरणी अनिरुद्ध ऊर्फ विकीबाळु जाधव( वय २६, रा. रावेत गाव, जाधव वस्ती, पिंपरी चिंचवड, ता. हवेली) निखिल सरोदे, (वय ३०, रा. डिलक्स चौक शेजारी, गणपती मंदिरासमोर, पिंपरी) यांना अटक करण्यात आली आहे. वारजे माळवाडी पोलीस स्टेशन हद्दीत वारजे माळवाडी वाहतुक विभागाचे पोलीस अंमलदार विशाल भिलारे वाहतुक नियमांचे कर्तव्य करत होते.
त्यांना वारजे ब्रिजच्या दिशेने एक संपुर्ण काळ्या काचा असलेली विनानंबर प्लेटची महिंद्रा थार चारचाकी गाडी येत असताना दिसली. भिलारे यांना संशय आल्याने त्यांनी ती गाडी अडवली. पोलिसांनी विचारपुस केली असता ते उडवा-उडवीची उत्तरे देवु लागले.
पोलिसांना त्यांच्यावर संशय आला. वारजे माळवाडी पोलीस स्टेशनच्या तपास पथकाचे पोलीस अधिकारी पोलीस उपनिरीक्षक रामेश्वर पार्वे यांच्या सोबत तपास पथकातील पोलीस स्टाफ या ठिकाणी तात्काळ हजर झाले. वारजे तपास पथकाचे अधिकारी येताच या दोन्ही संशयित व्यक्ती तिथून पळून जाऊ लागल्या. त्यांचा पाठलाग करुन त्यांना पोलिसांनी शिताफीने ताब्यात घेतले.
हे दोन्ही आरोपी हे पिंपरी चिंचवड भागातील सराईत गुन्हेगार आहेत. अनिरुद्ध ऊर्फ विकी बाळु जाधव हा पिंपरी चिंववड भागातील रावन टोळीचा म्होरक्या असल्याचे समोर आले. तसेच त्याला पुणे जिल्हा हद्दीतुन दोन वर्षांकरिता तडीपार केले असल्याचेही समजले. त्यांच्यावर गुन्हा दाखल करण्यात आला आहे. गुन्ह्याचा अधिक तपास हा पोलीस उपनिरीक्षक रामेश्वर पार्वे हे करत आहेत.
ही कामगिरी पोलीस उपआयुक्त परिमंडळ ३ संभाजी कदम, सहायक पोलीस आयुक्त कोथरुड विभाग भिमराव टेळे, वारजे माळवाडी पोलीस स्टेशनचे वरिष्ठ पोलीस निरीक्षक मनोज शेडगे, पोलीस निरीक्षक (गुन्हे) निळकंठ जगताप यांच्या मार्गदर्शनाखाली तपास पथकाचे अधिकारी सहायक पोलीस निरीक्षक रणजीत मोहिते, पोलीस अंमलदार प्रदिप शेलार, भुजंग इंगळे, मनोज पवार, विजय भुरुक, बंटी मोरे, श्रीकांत भांगरे, विक्रम खिलारी, संभाजी दराडे, अजय कामठे, सत्यजित लोंढे यांनी केली आहे.
