सुविधा द्या अन्यथा शिवसेना स्टाईल आंदोलन : उपशहरप्रमुख समीर तुपे यांचा इशारा
महाराष्ट्र न्यूज नेटवर्क
पुणे : पंधरा वर्ष नगरसेवक, पाच वर्ष आमदार की, तसेच राज्यात सत्ता असतानाही प्रभागातील माळवाडी येथील समस्यांच्या विळख्यात अडकलेल्या अमरधाम स्मशानभूमीला कोणीही वाली नाही. साडेचार लाख लोकांच्या भावनेशी खेळ करणाऱ्या लोकप्रतिनिधी व पालिका प्रशासनाने सुधारणा केली नाही तर शिवसेना स्टाईलने आंदोलन करण्याचा इशारा शिवसेनेचे उपशहरप्रमुख समीर तुपे यांनी दिला आहे.
माजी नगरसेविकेच्या मुलाचा अंत्यविधी येथे नुकताच झाला. तेव्हा मुसळधार पावसात हडपसर माळवाडी येथील स्मशानभूमी गळत होती, उभे रहायला जागा नव्हती. बसण्याचे बेंच तुटलेले होते, ही अवस्था बघता शिवसेना उद्धव बाळासाहेब ठाकरे पक्षाचे उपशहरप्रमुख समीर तुपे यांनी पत्रकारांना घेऊन अमरधाम स्मशानभूमी मध्ये पाहणी केली.
अन दुरावस्था समोर आली, पिण्याच्या पाण्याचे नळ तुटलेले, पत्रे फाटलेले, शौचालय घाणेरडे, पाण्याची डबकी, शीतपेट्या नादुरुस्त व पाण्याने भरलेल्या, ब्लॉक तुटलेले, साफसफाई नाही, कचऱ्याचे ढीग ही अवस्था पाहून त्यांनी संताप व्यक्त केला. मागील दफन भूमीजवळ कुंपण नाही, सुव्यवस्थित बाकडे आहे.
त्यामुळे नशा करणाऱ्यांची चांगलीच चंगळ होत आहे, त्यामुळे गुन्हेगारीला प्रोत्साहन देण्याचे काम लोकप्रतिनिधी करत आहेत का? असं सवाल समीर तुपे यांनी केला आहे. हडपसर गाव, माळवाडी, साडेसतरा नळी, मगरपट्टा, ससाणेनगर, काळेपडळ, १५ नंबर, सातववाडी – गोंधळेनगर, चिंतामणीनगर, वैदूवाडी, शंकरमठ परिसरातील नागरिकांची हडपसर येथील एकच अमरधाम स्मशानभूमी आहे.
या स्मशानभूमीमध्ये निधीची तरतूद नाही. समस्यांचे आगार झाले आहे. आमदार, प्रशासनाने दुर्लक्ष केले आहे. येथील अवस्था पाहता नागरिकांची कुचंबना होत असल्याने तातडीने कार्यवाही झाली नाही तर शिवसेनेच्या स्टाईलने आंदोलन करावे लागेल असा इशारा समीर तुपे यांनी दिला आहे.
आमदार चेतन तुपे यांच्या हक्काच्या मतदारसंघातील स्मशानभूमीची दुरावस्था झाल्याने अंत्यविधीला येणाऱ्या नागरिकांमध्ये संतापाचे वातावरण आहे. हडपसर जिवंत माणसांना जीवघेणे झालेले असताना अंत्यविधीप्रसंगी तरी सुविधा मिळणार का? असं सवाल समीर तुपे यांनी विचारला आहे.
