तिघांचा जागीच मृत्यू : सुनील तटकरेंना घेण्यासाठी निघालेले होते हेलिकॉप्टर
महाराष्ट्र न्युज नेटवर्क
पुणे : पुण्यातील बावधन बुद्रुक परिसरात आज बुधवार दिनांक २ ऑक्टोंबर २०२४ रोजी सकाळी हेलिकॉप्टर कोसळून तीन जणांचा मृत्यू झाल्याची खळबळजनक घटना समोर आली आहे. हे हेलिकॉप्टर ने राष्ट्रवादी कॉंग्रेसच्या अजित पवार गटाचे प्रदेशाध्यक्ष सुनिल तटकरे यांना घेण्यासाठी जाणार होते.
सुनील तटकरे यांना मुंबईतून घेण्यासाठी हे हेलिकॉप्टर निघाले होते, मात्र त्याआधीच हा भीषण अपघात झाला. मृतात एक इंजिनिअर, व दोन पायलटचा समावेश आहे.
हेलिकॉप्टर खासगी हेलिपॅडवरून सकाळी ७ :३० च्या सुमारास मुंबईकडे जाण्यासाठी उडाले होते.
सुनील तटकरे याच हेलिकॉप्टरने रायगड जिल्ह्यातील सुतारवाडी येथे जाणार होते. त्यासाठी ऑक्सफर्ड काऊंटी रिसॉर्टच्या हेलिपॅडवरुन सकाळी पावणेसातच्या सुमारास या हेलिकॉप्टरने उड्डाण केले होते. मात्र, त्यानंतर काही वेळातच हेलिकॉप्टर बावधन बुद्रुक परिसरातील दरीत कोसळले.
या भीषण अपघाताची माहिती मिळताच हिंजवडी पोलीस, अग्निशमन दल आणि राष्ट्रीय आपत्ती निवारण दल यांची पथके तातडीने घटनास्थळी दाखल झाली. या हेलिकॉप्टरचे नाव ऑगस्टा 109 असे होते. हेलिकॉप्टरमध्ये असलेल्या वैमानिकांची ओळख पटली आहे.
कॅप्टन पिल्लई आणि कॅप्टन परमजीत अशी मृत वैमानिकांची नावे आहेत. येत्या काही दिवसांमध्ये राज्यात विधानसभा निवडणुकीचा प्रचार सुरु होणार आहे. त्यासाठी राजकीय पक्षांना हे हेलिकॉप्टर भाडेतत्त्वार दिले जाणार असल्याचे बोलले जात आहे.
कुठे झाला अपघात ?
पुण्यात ऑक्सफर्ड काऊंटी रिसॉर्टच्या हेलिपॅडवरुन हेलिकॉप्टरने सकाळी साडेसात वाजताच्या सुमारास उड्डाण केलं होतं. काही अंतर कापल्यानंतरच हेलिकॉप्टरला बावधन बुद्रुक परिसरामध्ये अपघात झाला. ऑक्सफर्ड काऊंटी रिसॉर्ट आणि एचईएमआरएल या केंद्र सरकारची संस्थेच्या परिसरादरम्यान असलेल्या डोंगराळ भागात हेलिकॉप्टरने पेट घेतला. आणि त्यात असलेल्या दोन पायलट आणि एका इंजिनिअरचा घटनास्थळीच मृत्यू झाला.
