अंमली पदार्थ शोधून देणाऱ्या श्वान लिओ याचे निधन

मेफेड्रोनसह अंमली पदार्थ दिले होते पकडून, शासकीय इतमामात अंत्यसंस्कार

महाराष्ट्र न्यूज नेटवर्क

पुणे : पुणे शहर परिसरात वेगवेगळ्या ठिकाणी अंमली पदार्थ शोधण्यात गेली ८ वर्षे शहर पोलीस दलात मोलाची भूमिका पार पाडणारा श्वान लिओ याचे मंगळवारी निधन झाले. लिओ याला अन्न नलिकेचा आजार झाला होता. त्यातच त्याचे निधन झाले, महापालिकेच्या विद्युत दाहिनीमध्ये शासकीय इतमामात त्याच्यावर अंत्यसंस्कार करण्यात आले.

श्वान लिओ याचा जन्म २० जुलै २०१६ रोजी झाला असून त्याचा २० सप्टेंबर २०१६ रोजी शहर पोलीस दलात प्रवेश झाला. कोंढवा पोलीस स्टेशनच्या हद्दीतील एका नायजेरियन तस्कराकडून २८ डिसेबर २०१९ रोजी त्याने ५० किलो गांजा व एम डी सापडून दिले होते.

लोणी काळभोर येथील शेतामधून ७० किलो गांजा जप्त करण्यात त्याचा सहभाग होता. विविध रेल्वे स्टेशन, बस स्टँड, येरवडा कारागृह येथे नियमित तपासणी करुन अंमली पदार्थांचा शोध घेऊन त्याची माहिती तो देत असे.

तसेच इंडियन आर्मी जवानांकरीता डेमो प्रात्याक्षिके, विविध शाळांमध्ये प्रात्याक्षिके सादर करण्यात लिओ याचा सहभाग होता. लिओ याला अन्ननलिकेचा आजार असल्याचे नुकतेच निदान झाले होते.

यातच त्याचे मंगळवारी निधन झाले. तिरंगा ध्वजामध्ये लिपटलेल्या श्वान लिओ याला अनेकांनी श्रद्धांजली वाहत पुष्पचक्र अर्पण केले. यावेळी पोलीस उपायुक्त निखिल पिंगळे, सहायक पोलीस आयुक्त गणेश इंगळे तसेच एम ओ बी चे पोलीस निरीक्षक, श्वान पथक पोलीस उपनिरीक्षक, श्वान पथक पोलीस अंमलदार, सलामी गार्ड उपस्थित होते.