उपकाराची अशी केली परतफेड : हवेली पोलिसांनी चौघांना केली अटक
महाराष्ट्र न्युज नेटवर्क
पुणे : जमीन खरेदी-विक्रीच्या व्यवसायात ते भागीदार होते. भागीदाराने स्वत:च्या फ्लॅटवर कर्ज काढून १८ लाख ५० हजार रुपये वापरण्यास दिले होते. या कर्जाची परतफेड न करता, त्याचाच खून करून त्याने केलेल्या उपकारांची अशी परतफेड केल्याचा धक्कादायक प्रकार समोर आला आहे. हवेली पोलिसांनी सतीश थोपटे यांच्या खून प्रकरणात चौघांना अटक केली आहे.
जीवन ऊर्फ बाळा शैलेश जगताप (वय २७, रा. भंडारी हॉटेलच्या मागे, दत्तवाडी), अक्षय ऊर्फ बाबु बालाजी शेलार (वय २४, रा. शिवरे, ता. भोर), साहेल ऊर्फ फुक्या साजिदअली जोरा (वय १९, रा. शिवरे बस स्थानकाजवळ, ता. भोर), देविदास ऊर्फ देवा लक्ष्मण तांबट (वय २०, रा. कांजळे, तांबट आळी, ता. भोर) अशी अटक केलेल्या आरोपींची नावे आहेत.
मुख्य आरोपी भाऊसाहेब सदाशिव किवळे (रा. धायरी फाटा) हा फरारी आहे. सतीश सुदाम थोपटे (वय ३७, रा. सुशीला पार्क, कोल्हेवाडी) असे खून झालेल्यांचे नाव आहे. याबाबत अनिता सतीश थोपटे (वय ३१, रा. सुशीला पार्क, कोल्हेवाडी, खडकवासला) यांनी हवेली पोलीस स्टेशनमध्ये फिर्याद दिली आहे.
याबाबत पोलिसांनी दिलेल्या माहितीनुसार, सतीश थोपटे आणि भाऊसाहेब किवळे यांचा भागीदारीत जमीन खरेदी-विक्रीचा व्यवसाय होता. सतीश थोपटे यांनी फ्लॅटवर कर्ज काढून कर्जाची रक्कम १८ लाख ५० हजार रुपये भाऊसाहेब किवळे यांना दिली होती. हे कर्ज भाऊसाहेब किवळे हे परत करणार असे ठरले होते.
परंतु, कर्जाची रक्कम न भरल्याने सतीश थोपटे यांनी पैसे मागण्यास सुरुवात केली. पैसे मिळत नसल्याने सतीश थोपटे यांनी भाऊसाहेब किवळे यांनी कर्ज फेडले नसून त्याची कर्ज फेडण्याची लायकी नाही, असा मजकूर व्हॉट्सअ‍ॅप स्टेटसवर ठेवला.
त्याचा राग मनात धरून भाऊसाहेब किवळे यांनी त्यांच्या चार साथीदारांना पाठवून सतीश थोपटे यांचा कोल्हेवाडी येथील घरासमोर २७ नोव्हेंबर रोजी दुपारी कोयत्याने वार करून खून केला.
लोकवस्तीत भरदिवसा हा गुन्हा घडल्याने त्याचे गांभीर्य लक्षात घेऊन गुन्हा उघडकीस आणण्याच्या दृष्टीने पोलीस अधीक्षक पंकज देशमुख यांनी स्थानिक गुन्हे शाखेस सूचना केल्या होत्या. स्थानिक गुन्हे शाखेची दोन पथके तयार करून गुन्ह्याचा समांतर तपास सुरू केला. घटनास्थळावरील सीसीटीव्ही फुटेज तपासण्यात आले.
त्यात चार अनोळखी गुन्हेगार कोयत्याने वार करत असल्याचे दिसून आले. आरोपींची ओळख पटविण्यासाठी बातमीदारांकडे संपर्क साधल्यावर त्यातील एक आरोपी रेकॉर्डवरील गुन्हेगार देविदास ऊर्फ देवा लक्ष्मण तांबट असल्याचे सांगण्यात आले.
त्यानुसार त्यांचा शोध घेत असताना चारही आरोपी खेड शिवापूर परिसरात असून ते कोल्हापूरकडे पळून जाण्याच्या तयारीत असल्याची माहिती स्थानिक गुन्हे शाखेच्या पथकाला मिळाली. त्यानंतर पथकाने तातडीने कारवाई करून चारही आरोपींना पकडले. प्राथमिक चौकशीत त्यांनी गुन्हा केल्याचे कबूल केले आहे.
पुढील तपासासाठी आरोपींना हवेली पोलीस स्टेशनच्या ताब्यात देण्यात आले आहे. देविदास ऊर्फ देवा तांबट याच्यावर पूर्वी खून करण्याचा प्रयत्न केल्याचा गुन्हा दाखल आहे. मुख्य आरोपी भाऊसाहेब किवळे याचा शोध सुरू आहे.
ही कामगिरी पोलीस अधीक्षक पंकज देशमुख, अपर पोलीस अधीक्षक रमेश चोपडे, उपविभागीय पोलीस अधिकारी सुनील कुमार पुजारी यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, हवेलीचे पोलीस निरीक्षक सचिन वांगडे, स्थानिक गुन्हे शाखेचे सहाय्यक पोलीस निरीक्षक कुलदीप संकपाळ, दत्ताजीराव मोहिते, पोलीस
उपनिरीक्षक अभिजित सावंत, अंमलदार हनुमंत पासलकर, रामदास बाबर, राजू मोमीण, मंगेश थिगळे, अमोल शेडगे, मंगेश भगत, वैभव सावंत, काशिनाथ राजापुरे, हवेली पोलीस स्टेशनचे सहाय्ययक पोलीस निरीक्षक सागर पवार, पोलीस उपनिरीक्षक संजय सुतनासे, पोलीस अंमलदार विकास प्रधान, राजू मुंढे, संतोष तोडकर, महेंद्र चौधरी यांनी केली.
