हडपसरमधील भाऊराव पाटील चौकातील घटना
महाराष्ट्र न्युज नेटवर्क
पुणे : राज्य शासनाने बहिणीच्या नावावर दर महा १५०० रुपये पाठविण्याची लाडकी बहिण योजना सुरु केल्यापासून तिचा मोठा गाजावाजा होत आहे. नुकत्याच झालेल्या निवडणुकीत या लाडक्या बहिणींनी महायुतीला भरभरुन मते दिली. याच लाडकी बहिणीच्या नावाने आता महिलांना लुबाडण्याचे सत्र सुरु झाले आहे. लाडकी बहिणीचे पैसे देत असल्याचे सांगून एका चोरट्याने वृद्ध महिलेच्या गळ्यातील मंगळसुत्र व आंगठी असे ८० हजार रुपयांचे दागिने चोरुन नेले.
याबाबत हडपसर येथील एका ७० वर्षाच्या महिलेने हडपसर पोलीस स्टेशनमध्ये फिर्याद दिली आहे. ही घटना हडपसरमधील कर्मवारी भाऊराव पाटील १५ नंबर चौकात २७ नोव्हेंबर रोजी सकाळी ११ वाजता घडली.
याबाबत पोलिसांनी दिलेल्या माहितीनुसार, फिर्यादी या स्वस्त धान्य दुकानाचे कुपण घेऊन सकाळी ११ वाजता घरी परत चालल्या होत्या. यावेळी पेट्रोल पंपाजवळ एक जण त्यांना भेटला व त्याने सांगितले की, चला मावशी येथे एक साहेब लाडकी बहिणीचे पैसे वाटप करीत आहेत, असे बोलून त्याने फिर्यादी यांना भाऊराव पाटील १५ नंबर चौकात घेऊन आला.
फिर्यादी यांना तो म्हणाला या ठिकाणी बसा येथे ५ हजार रुपये वाटत आहे, असे बोलून तो निघून गेला. बराच वेळ वाट पाहून त्या घरी निघून आल्या. त्यानंतर त्यांनी पाहिले की त्यांच्या गळ्यातील मंगळसुत्र व अंगठी असा ८० हजार रुपयांचा ऐवज काढून घेऊन चोरटा निघून गेला होता.
