खंडणी विरोधी पथकाची प्रभावी कामगिरी
महाराष्ट्र न्यूज नेटवर्क
पुणे : पिंपरी चिंचवड पोलिसांनी मोशी येथील आठवडे बाजारात भाजीपाला विक्रेत्यांकडे खंडणी मागून दहशत माजवणाऱ्या सराईत गुन्हेगाराला कात्रजमधून अटक केली आहे. तसेच दोन अल्पवयीन मुलांना ताब्यात घेतले आहे. आरोपी अनिकेत भरत उतळे (वय १९, रा. श्रीराम कॉलनी, आदर्शनगर, मोशी) याला व दोघा अल्पवयीन मुलांना भारती विद्यापीठ हॉस्पिटलसमोरील अश्विनी लॉज येथून पकडण्यात आले आहे.
मोशीतील आदर्शनगर येथे आठवडे बाजारात भाजीपाला विक्रेत्यांकडे खंडणी मागण्यात आली. आरोपींनी बाजारात दुकान लावण्यासाठी प्रत्येक विक्रेत्याकडून २०० रुपये खंडणीची मागणी केली. पैसे न दिल्याने त्यांनी विक्रेत्यांच्या ३-४ गाड्यांच्या काचा फोडल्या व दुचाकीवर कोयत्याने वार केला. शिवाय हवेत कोयता फिरवून दहशत निर्माण केली.
पीडित शेषराव फड (वय ५०, रा. विनायकनगर, मोशी) यांनी एमआयडीसी भोसरी पोलीस ठाण्यात तक्रार दिली. घटनेचे गांभीर्य ओळखून पोलीस उपायुक्त संदीप डोईफोडे यांच्या आदेशानुसार खंडणी विरोधी व औद्योगिक तक्रारी निवारण पथकाने तपास सुरू केला. तांत्रिक विश्लेषण व मिळालेल्या माहितीच्या आधारे आरोपींना कात्रज येथून पकडण्यात आले.
ही कारवाई पोलीस आयुक्त विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त वसंत परदेशी यांच्या मार्गदर्शनाखाली करण्यात आली. खंडणी विरोधी पथकाचे वरिष्ठ पोलीस निरीक्षक देवेंद्र चव्हाण व त्यांच्या सहकाऱ्यांनी मोठ्या शिताफीने गुन्हेगारांना ताब्यात घेतले.
आरोपी अनिकेत उतळे व दोन अल्पवयीन मुलांना पुढील तपासासाठी एमआयडीसी भोसरी पोलीस ठाण्याच्या ताब्यात देण्यात आले आहे. या प्रकरणाने परिसरातील विक्रेत्यांमध्ये निर्माण झालेली दहशत पोलिसांच्या कामगिरीमुळे दूर झाली आहे.
