‘आरटीओ’कडून सहा पथके तैनात
महाराष्ट्र न्यूज नेटवर्क
पुणे : खासगी कारमधून प्रवासी वाहतूक करणे बेकायदेशीर आहे, असे मोटार वाहन कायद्यानुसार नमूद आहे. मात्र, पुण्यात अशा प्रकारची वाहतूक मोठ्या प्रमाणावर होत असल्याच्या तक्रारी प्राप्त झाल्याने प्रादेशिक परिवहन विभागाने (आरटीओ) कारवाई सुरू केली आहे.
पुण्यात अनेक कारचालक खासगी वाहनांचा वापर करून प्रवाशांची वाहतूक करत आहेत. त्यामुळे तक्रारी वाढल्यानंतर आरटीओने सहा पथके तयार करून कारवाई मोहीम राबवली आहे. वाघोली, विमाननगर, हडपसर, स्वारगेट, चांदणी चौक, नवले पूल या वाहतूक कोंडीच्या प्रमुख ठिकाणी ही कारवाई करण्यात येत आहे.
खासगी कारमधून प्रवासी वाहतुकीसाठी एका खासगी अॅपचा वापर केला जातो. वाहनचालक त्या अॅपवरून कारमध्ये किती जागा आहे आणि कुठे जाणार आहे याची माहिती देतात. प्रवासी त्यानुसार ऑनलाइन सीट बुकिंग करून प्रवास करतात. हा प्रकार मोटार वाहन कायद्याच्या विरोधात आहे, असे आरटीओने स्पष्ट केले आहे.
आरटीओच्या अधिकाऱ्यांनी सांगितले की, वायुवेग पथकातील कर्मचारी डमी प्रवासी म्हणून अॅपवरून बुकिंग करून पुरावे गोळा करत आहेत. मोटार वाहन कायद्याच्या उल्लंघनाबद्दल दहा हजार रुपयांच्या दंडाची तरतूद आहे.
खासगी वाहनांद्वारे होणाऱ्या अवैध प्रवासी वाहतुकीवर नियंत्रण आणण्यासाठी आरटीओकडून प्रभावी मोहीम हाती घेतली गेली आहे. त्यामुळे पुण्यात वाहतुकीच्या नियमांचे पालन अधिक काटेकोर होण्याची अपेक्षा आहे.
Latest Articles
