गुन्हा दाखल न करण्यासाठी मागितली होती तीन लाखांची लाच
महाराष्ट्र न्यूज नेटवर्क
पुणे : प्रधानमंत्री कृषी सिंचन योजनेतील कसुरीबाबत गुन्हा दाखल न करण्यासाठी आणि निलंबनाच्या कारवाईत मदत करण्यासाठी तीन लाखांची लाच मागून अडीच लाख रुपये लाच घेताना फलोत्पादन उपसंचालकाला लाचलुचपत प्रतिबंधक विभागाने रंगेहाथ पकडले.
संजय महादू गुंजाळ (उपसंचालक, फलोत्पादन-४ आणि प्रभारी सहसंचालक, फलोत्पादन, कृषी आयुक्त कार्यालय, शिवाजीनगर) असे अटक करण्यात आलेल्या अधिकार्याचे नाव आहे. या कारवाईनंतर त्यांच्या फोर्ड इकोस्पोर्ट कारची तपासणी केली असता, कारमध्ये २ लाख १५ हजार रुपयांची रोकड आढळून आली.
तक्रारदार २०१९-२० मध्ये बुलडाणा जिल्ह्यात जळगाव जामोद येथे तालुका कृषी अधिकारी कार्यालयात कनिष्ठ लिपिक या पदावर कार्यरत होते. त्या वेळी प्रधानमंत्री कृषी सिंचन योजनेतील सूक्ष्म सिंचन (ठिबक) योजनेशी संबंधित कसुरीबाबत चौकशी करण्यात आली होती. या चौकशीच्या अहवालानंतर अमरावती विभागाचे कृषी सहसंचालक यांनी १७ डिसेंबर २०२४ रोजी तक्रारदाराला सेवेतून निलंबित केले.
कृषी आयुक्तालयातील उपसंचालक संजय गुंजाळ यांनी निलंबनाच्या कारवाईत मदत करण्यासाठी आणि तक्रारदाराविरुद्ध गुन्हा दाखल होऊ नये यासाठी तीन लाख रुपयांची लाच मागितली होती. तक्रारदाराने लाचलुचपत प्रतिबंधक विभागाकडे तक्रार दिल्यानंतर तिची पडताळणी करण्यात आली. त्यानुसार संजय गुंजाळ यांनी तडजोड करून अडीच लाख रुपये घेण्यास संमती दिली.
शुक्रवारी संगमवाडी येथील खुराणा खासगी ट्रॅव्हल्स कार्यालयासमोरील रस्त्यावर लाचलुचपत प्रतिबंधक विभागाने सापळा रचला. तक्रारदाराकडून अडीच लाख रुपये घेताना संजय गुंजाळ यांना रंगेहाथ पकडण्यात आले. येरवडा पोलीस ठाण्यात त्यांच्याविरुद्ध गुन्हा दाखल करण्यात आला आहे. ही कारवाई पोलीस अधीक्षक शिरीष सरदेशपांडे आणि अपर पोलीस अधीक्षक विजय पवार यांच्या मार्गदर्शनाखाली करण्यात आली.
