पुणे महापालिकेत पहिली महिला नगरसचिव म्हणून रचला इतिहास
महाराष्ट्र न्यूज नेटवर्क
पुणे: पुणे महापालिकेच्या नगरसचिवपदी योगिता भोसले यांची नियुक्ती करण्यात आली असून त्या या पदावर विराजमान होणाऱ्या पहिल्या महिला ठरल्या आहेत. यापूर्वी त्या प्रभारी नगरसचिव म्हणून कार्यरत होत्या. त्यांच्या नियुक्तीमुळे तब्बल चार वर्षांनंतर पुणे महापालिकेला स्थायी नगरसचिव मिळाला आहे.
महापालिकेच्या नगरसचिवपदावरून सुनील पारखी हे २०२० साली निवृत्त झाले. त्यानंतर शिवाजी दौंडकर यांची प्रभारी नगरसचिव म्हणून नियुक्ती करण्यात आली होती. २०२३ मध्ये दौंडकर निवृत्त झाल्यानंतर नगरसचिवपद पुन्हा रिक्त झाले.
योगिता भोसले या महापालिकेच्या राजशिष्टाचार अधिकारी म्हणून कार्यरत असताना त्यांच्याकडे प्रभारी नगरसचिवपदाची जबाबदारी देण्यात आली. आता त्यांच्या नियुक्तीमुळे हे पद स्थायिक झाले आहे.
योगिता भोसले यांच्या नियुक्तीबाबत माजी महापौर संघटनेने त्यांचे अभिनंदन केले आहे. संघटनेच्या अध्यक्ष राजलक्ष्मी भोसले, सचिव कमल व्यवहारे, आणि निमंत्रक अंकुश काकडे यांनी संयुक्तपणे म्हटले, “योगिता भोसले यांची निवड योग्य झाली आहे. त्यांनी नगरसचिव कार्यालयात अनेक वर्षे प्रामाणिकपणे काम केले आहे.
कुठल्याही राजकीय हस्तक्षेपाला बळी न पडता त्या नियमांचे पालन करीत आल्या आहेत.” योगिता भोसले यांच्या रूपाने पुणे महापालिकेला सक्षम आणि कर्तव्यदक्ष नगरसचिव मिळाल्या आहेत, हे शहराच्या प्रशासकीय इतिहासातील महत्त्वाचे पाऊल आहे.
Latest Articles
