पोलीस सह आयुक्तपदी संजय दराडे

खरात प्रकरण एसआयटी प्रमुख तेजस्वी सातपुते बढतीवर पुण्यात : हिम्मत जाधव, संभाजी कदम यांची बदली

महाराष्ट्र न्युज नेटवर्क

पुणे : गृह विभागाने राज्यातील ९२ अतिवरिष्ठ पोलीस अधिकारी, पोलीस अधीक्षक आणि अपर अधीक्षक यांच्या बदल्या केल्या आहेत. त्यात पुणे शहर पोलीस सहआयुक्त रंजनकुमार शर्मा यांची कोल्हापूर परिक्षेत्रचे विशेष पोलीस महानिरीक्षकपदी बदली करण्यात आली आहे. त्यांच्या जागी कोकण परिक्षेत्रचे विशेष पोलीस महानिरीक्षक संजय दराडे यांची नियुक्ती करण्यात आली आहे. कोल्हापूर परिक्षेत्रचे विशेष पोलीस महानिरीक्षक सुनील फुलारी यांची गुन्हे अन्वेषण विभागात विशेष पोलीस महानिरीक्षकपदी नियुक्ती करण्यात आली आहे.

राज्य राखीव पोलीस दल गट क्रमांक १ चे समादेशक आणि अशोक खरात विशेष तपास पथकाच्या प्रमुख तेजस्वी सातपुते यांची पुणे शहर पोलीस दलात अपर पोलीस आयुक्त (गुन्हे) पदावर बढतीवर नियुक्ती करण्यात आली आहे. पोलीस उपायुक्त संभाजी कदम यांची सीआयडीमध्ये पोलीस अधीक्षकपदी बदली करण्यात आली आहे. वाहतूक शाखेचे पोलीस उपायुक्त हिम्मत जाधव यांचीही मुंबईला बदली करण्यात आली आहे.

प्रमुख पोलीस अधिकाऱ्यांच्या बदल्या पुढीलप्रमाणे :

पोलीस अधिकारी (सध्याचे पद) – बदलीचे ठिकाण

पोलीस उपायुक्त संभाजी कदम (पुणे शहर) – पोलीस अधीक्षक, सीआयडी
पी. आर. पाटील (पोलीस अधीक्षक, सीआयडी) – पोलीस उपायुक्त, पुणे शहर
गौहर हसन (पोलीस उपायुक्त, मुख्यालय, सोलापूर) – पोलीस उपायुक्त, पुणे शहर
संजय सरगौडा पाटील (पोलीस उपायुक्त, नवी मुंबई) – पोलीस उपायुक्त, पिंपरी-चिंचवड
धीरज पाटील (प्राचार्य, पोलीस प्रशिक्षण केंद्र, तासगाव, सांगली) – पोलीस उपायुक्त, पिंपरी-चिंचवड
हिम्मत जाधव (पोलीस उपायुक्त, पुणे शहर) – पोलीस उपायुक्त, बृहनमुंबई
रोहिदास पवार (अपर पोलीस अधीक्षक, लोहमार्ग, पुणे) – पोलीस उपायुक्त, पिंपरी-चिंचवड
डॉ. शिवाजी पवार (पोलीस उपायुक्त, पिंपरी-चिंचवड) – पोलीस उपायुक्त, बृहनमुंबई
विक्रम देशमुख (पोलीस अधीक्षक, महामार्ग सुरक्षा, पुणे) – पोलीस उपायुक्त, मिरा-भाईंदर, वसई-विरार
विशाल गायकवाड (पोलीस उपायुक्त, पिंपरी) – अपर पोलीस अधीक्षक, लोहमार्ग, पुणे
शफकत आमना (अपर पोलीस अधीक्षक, धाराशिव) – पोलीस अधीक्षक, सीआयडी, पुणे
शुभम कुमार (सहायक पोलीस अधीक्षक, अचलपूर, अमरावती) – अपर पोलीस अधीक्षक, पुणे ग्रामीण