भूम येथील शंकरराव पाटील महाविद्यालयात ‘विस्तार केंद्र उद्घाटन आणि कार्यशाळेचे’ यशस्वी आयोजन

महाराष्ट्र न्यूज नेटवर्क

भूम : येथील विद्या विकास मंडळ, पाथरुड संचलित व डॉ. बाबासाहेब आंबेडकर मराठवाडा विद्यापीठ, छत्रपती संभाजीनगरशी संलग्नित शंकरराव पाटील महाविद्यालयात ‘आजीवन अध्ययन व विस्तार विभागा’अंतर्गत विस्तार केंद्राचे उद्घाटन तसेच विद्यार्थी समुपदेशन व व्यवसाय मार्गदर्शन कार्यशाळा सोमवार, दिनांक १२ ऑक्टोबर २०२६ रोजी सकाळी १० वाजता अत्यंत उत्साहात आणि यशस्वीरीत्या संपन्न झाली.

या कार्यक्रमाचे सविस्तर वृत्त खालीलप्रमाणे :

पहिले सत्र : उद्घाटन सत्र – कार्यक्रमाचे उद्घाटन आणि प्रमुख मार्गदर्शन प्रो. डॉ. अश्विन रांजणीकर (संचालक, आजीवन अध्ययन व विस्तार विभाग, डॉ. बाबासाहेब आंबेडकर मराठवाडा विद्यापीठ) यांच्या हस्ते झाले. या सत्राच्या अध्यक्षस्थानी महाविद्यालयाच्या प्राचार्या डॉ. अनुराधा जगदाळे होत्या.

दुसरे सत्र : व्यक्तिमत्त्व विकास – या सत्रात ‘व्यक्तिमत्त्व विकास’ या विषयावर अभ्यासपूर्ण मार्गदर्शन करण्यात आले. या सत्राचे प्रमुख पाहुणे म्हणून राज्यपाल नियुक्त अधिसभा सदस्य (डॉ. बाबासाहेब आंबेडकर मराठवाडा विद्यापीठ, छत्रपती संभाजीनगर) श्री. देवीदास पाठक उपस्थित होते. या सत्राचे अध्यक्षपद शंकरराव पाटील कनिष्ठ महाविद्यालयाचे प्राचार्य डॉ. संतोष शिंदे (उपसचिव, विद्या विकास मंडळ, पाथरुड) यांनी भूषवले.

तिसरे सत्र : लेखन व संभाषण कौशल्य – विद्यार्थ्यांना सध्याच्या काळातील महत्त्वाचे कौशल्य असलेल्या ‘लेखन व संभाषण कौशल्या’ या विषयावर मार्गदर्शन करण्यात आले. या सत्राचे वक्ते म्हणून महाविद्यालयातील डॉ. गोविंद गरड यांनी विद्यार्थ्यांना बहुमोल मार्गदर्शन केले. या सत्राच्या अध्यक्षस्थानी प्रो. डॉ. के. जी. गव्हाणे उपस्थित होते.

चौथे सत्र : स्पर्धा परीक्षा मार्गदर्शन – या सत्रात विद्यार्थ्यांना ‘स्पर्धा परीक्षा मार्गदर्शन’ या विषयावर माहिती देण्यात आली. इतिहास विभागाचे डॉ. नंदू जगदाळे यांनी वक्ते म्हणून उपस्थित राहून विद्यार्थ्यांना स्पर्धा परीक्षांची तयारी कशी करावी, याबद्दल सविस्तर माहिती दिली. या सत्राचे अध्यक्षपद प्रो. डॉ. तानाजी बोराडे यांनी भूषवले.

समारोप सत्र – कार्यशाळेच्या समारोप सत्राचे प्रमुख पाहुणे म्हणून श्री. देवीदास पाठक उपस्थित होते. या सत्राचे अध्यक्षस्थान प्राचार्या डॉ. अनुराधा जगदाळे यांनी भूषवले. या संपूर्ण कार्यक्रमाचे नेटके संयोजन व नियोजन आजीवन अध्ययन व विस्तार विभागाचे कार्यक्रमाधिकारी डॉ. शामसुंदर आगे यांनी केले. या कार्यशाळेचा महाविद्यालयातील असंख्य विद्यार्थ्यांनी लाभ घेतला. हा कार्यक्रम अत्यंत यशस्वीरीत्या पार पडला.