महाराष्ट्र जैन वार्ता
पुणे : विद्यार्थ्यांच्या दृष्टीने गॅदरिंग व बक्षीस समारंभ हे वर्षभराचा ताण कमी करणारे असतात. मात्र, अशा उपक्रमांचा आनंद घेत असतानाच विद्यार्थ्यांनी आपल्या जीवनात शैक्षणिक व व्यावसायिक संधी शोधाव्यात. संधींतूनच मोठी स्वप्ने पाहा, तरच तुमच्या ध्येयात यशस्वी व्हाल, असे कार्यक्रमाचे प्रमुख पाहुणे राज देशमुख यांनी अर्हम फाउंडेशनच्या कार्यक्रमात बोलताना सांगितले.
अर्हम् फाउंडेशनच्या कार्यक्रमात अर्हम् कला व वाणिज्य, अर्हम् विधी, अर्हम् कनिष्ठ, अर्हम् माहिती तंत्रज्ञान तसेच अर्हम् एट्रिपलआयएस या महाविद्यालयांतील विद्यार्थ्यांनी सहभाग घेतला. कार्यक्रमाची सुरुवात प्रमुख पाहुणे राज देशमुख, अध्यक्ष – चांगुल चळवळ संस्था, तसेच सन्माननीय अतिथी डॉ. सुदाम शेळके, संचालक – सावित्रीबाई फुले पुणे विद्यापीठ, यांच्या हस्ते दीपप्रज्वलन करून झाली.
यावेळी फाउंडेशनचे अध्यक्ष डॉ. शैलेश पगारिया, सचिव डॉ. आतिश चोरडिया, खजिनदार श्रीकांत पगारिया, आयटी प्रमुख स्वराज पगारिया तसेच विविध महाविद्यालयांचे प्राचार्य डॉ. सतीश भोसले, डॉ. मेहबुबसाब नगरबावडी, डॉ. नेहा पाटील, डॉ. अमन मिश्रा, प्रभा बटवाल यांच्यासह सर्व शिक्षक, शिक्षकेतर कर्मचारी, विद्यार्थी व माजी विद्यार्थी उपस्थित होते.
कार्यक्रमाची सुरुवात विधी महाविद्यालयाच्या विद्यार्थिनींनी गणेशवंदना सादर करून केली. प्राचार्या प्रभा बटवाल यांनी प्रमुख पाहुणे व उपस्थितांचे स्वागत केले. प्राचार्य डॉ. नेहा पाटील यांनी अर्हम् फाउंडेशन व इतर महाविद्यालयांची सविस्तर माहिती आपल्या प्रस्तावनेत दिली.
फाउंडेशनचे अध्यक्ष डॉ. शैलेश पगारिया यांनी फाउंडेशनच्या माध्यमातून पुणे, महाराष्ट्रासह सात विविध देशांमध्ये शैक्षणिक जाळे पसरले असून हजारो विद्यार्थी शिक्षण घेऊन उच्च पदांवर कार्यरत असल्याचे सांगितले.
प्रमुख पाहुण्यांच्या हस्ते क्रीडा क्षेत्रात राज्य, राष्ट्रीय व आंतरराष्ट्रीय स्तरावर यश मिळविणाऱ्या बारा खेळाडूंना ट्रॉफी व बक्षिसे देऊन गौरविण्यात आले. तसेच आंतरमहाविद्यालयीन क्रीडा स्पर्धांतील ६० आणि शैक्षणिक गुणवत्तेत प्रावीण्य प्राप्त केलेल्या विविध महाविद्यालयांतील ६५ विद्यार्थ्यांना गौरविण्यात आले.
विविध गुणदर्शन कार्यक्रमांतर्गत अनुक्रमे गायन व नृत्य प्रकारात गणेशवंदना, मायभवानी, मायकेल जॅक्सन ब्रेक डान्स, लल्लाटी-भंडार, आईगिरी-नंदिनी, क्लासिकल, लावणी, दक्षिण भारतीय, महाभारत तसेच ढोली-तारो या गाण्यांवर विद्यार्थ्यांनी नृत्य सादर केले.
यावेळी प्राचार्य डॉ. सतीश भोसले सेवानिवृत्त होत असल्याने त्यांचा विशेष सत्कार करण्यात आला. प्रमुख पाहुणे डॉ. सुदाम शेळके यांनी खेळातून कुशलता कशी साधता येईल, तसेच शैक्षणिक करिअर करताना खेळालाही महत्त्व आहे, भविष्यात करिअर करण्याची संधी सोडू नये, असे विद्यार्थ्यांशी संवाद साधताना सांगितले.
कार्यक्रमाच्या शेवटी डॉ. अमन मिश्रा यांनी उपस्थित पाहुणे, विद्यार्थी, पालक व माजी विद्यार्थ्यांचे आभार मानले. कार्यक्रमाची सांगता “वंदे मातरम्” या गीताने झाली.
