‘हॅलो जिंदगी’ कार्यक्रमाने YDS च्या २१व्या कार्यवर्षाची उत्साहपूर्ण सुरुवात

प्रेरणादायी विचार, सुरेल संगीत आणि सकारात्मक ऊर्जेने सदस्य मंत्रमुग्ध

महाराष्ट्र न्यूज नेटवर्क

पुणे : जैन दांपत्यांच्या सामाजिक, सांस्कृतिक, बौद्धिक आणि व्यक्तिमत्त्व विकासासाठी कार्यरत असलेल्या युगल धर्म संघ (YDS) या संस्थेच्या २१व्या कार्यवर्षाची उत्साहपूर्ण सुरुवात टिळक रस्त्यावरील आयएमए सांचेती हॉल येथे आयोजित ‘हॅलो जिंदगी’ या प्रेरणादायी कार्यक्रमाने झाली. प्रेरणादायी विचार, सुरेल संगीत आणि सकारात्मक ऊर्जेने भरलेल्या या कार्यक्रमाला सदस्यांचा उत्स्फूर्त प्रतिसाद लाभला.

प. पू. उपाध्याय प्रवीणऋषीजी म. सा. यांच्या प्रेरणा, मार्गदर्शन आणि आशीर्वादातून स्थापन झालेल्या युगल धर्म संघाने गेली २० वर्षे समाजोपयोगी उपक्रम, अध्यात्म, बौद्धिक प्रगती, व्यक्तिमत्त्व विकास तसेच सदस्यांमधील स्नेह दृढ करण्यासाठी सातत्याने कार्य केले आहे.

या प्रवासानंतर संस्थेच्या २१व्या कार्यवर्षाची सुरुवात प्रेरणादायी वातावरणात करण्यात आली. कार्यक्रमात प्रमुख वक्त्या द्वारका जालान यांनी जीवनाकडे सकारात्मक दृष्टीकोन, कृतज्ञता, आनंद आणि समाधानाने पाहण्याचा प्रेरणादायी संदेश दिला.

त्यांच्या प्रभावी मार्गदर्शनामुळे उपस्थितांना नव्या ऊर्जेची अनुभूती मिळाली तसेच जीवनाकडे नव्या दृष्टीने पाहण्याची प्रेरणा मिळाली.
यानंतर सुप्रसिद्ध गायक संदीप पंचवटकर यांनी सादर केलेल्या सुरेल गीतांनी सभागृहातील वातावरण भारावून गेले.

प्रेरणादायी विचार आणि संगीताचा सुंदर संगम अनुभवत उपस्थितांनी कार्यक्रमाचा मनमुराद आनंद लुटला. कार्यक्रमाच्या यशस्वी आयोजनासाठी शशिकांत भंडारी, हेमंत रायसोनी, सचिन रायसोनी तसेच संपूर्ण YDS बोर्ड यांनी केलेल्या नियोजन, व्यवस्थापन आणि परिश्रमांचे सर्व स्तरांतून कौतुक करण्यात आले.

यावेळी YDS चे अध्यक्ष विजय भंडारी यांनी कार्यक्रमाच्या यशस्वीतेसाठी योगदान देणारे प्रमुख मान्यवर, कलाकार, सदस्य, बोर्ड सदस्य आणि उपस्थितांचे मनःपूर्वक आभार मानले. ते म्हणाले, “‘हॅलो जिंदगी’ हा केवळ मनोरंजनाचा कार्यक्रम नसून मैत्री, सकारात्मकता, प्रेरणा आणि समाजसेवेच्या भावनेने नव्या कार्यवर्षाची सुरुवात करणारा प्रेरणादायी उपक्रम आहे.

आगामी काळातही YDS विविध सामाजिक, सांस्कृतिक, आध्यात्मिक आणि प्रेरणादायी उपक्रमांच्या माध्यमातून सदस्यांना एकत्र आणत समाजहितासाठी कार्यरत राहील.”

कार्यक्रमाला लाभलेल्या उत्स्फूर्त प्रतिसादामुळे YDS च्या २१व्या कार्यवर्षाची दणक्यात सुरुवात झाली असून, संस्थेच्या आगामी उपक्रमांविषयी सदस्यांमध्ये मोठा उत्साह आणि उत्सुकता निर्माण झाली आहे.