‘डिजिटल गोल्ड’मध्ये गुंतवणुकीच्या आमिषाने ९४ लाखांची फसवणूक

५५ वर्षीय नोकरदाराला गंडा : सायबर पोलिसांनी दाखल केला गुन्हा

महाराष्ट्र न्यूज नेटवर्क

पुणे : ‘डिजिटल गोल्ड’मध्ये गुंतवणुकीचे आमिष दाखवून सायबर चोरट्यांनी एका नोकरदाराची ९४ लाख ४० हजार रुपयांची फसवणूक केल्याचा प्रकार उघडकीस आला आहे.

याबाबत कल्याणीनगर येथील एका ५५ वर्षीय नोकरदाराने शिवाजीनगर येथील सायबर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, सायबर चोरट्यांनी फिर्यादीच्या मोबाईलवर संदेश पाठविला होता.

चोरट्यांनी त्यांना ‘डिजिटल गोल्ड’मध्ये गुंतवणुकीचे आमिष दाखविले. गुंतवणूक योजना तसेच परताव्याबाबत माहिती देऊन चोरट्यांनी त्यांना जाळ्यात ओढले.

पैसे गुंतविल्यास चांगला परतावा मिळेल, असे सांगून चोरट्यांनी गेल्या सात ते आठ महिन्यांत त्यांच्याकडून वेळोवेळी ऑनलाइन पद्धतीने पैसे घेतले.

फिर्यादीने चोरट्यांच्या बँक खात्यांमध्ये वेळोवेळी ९४ लाख ४० हजार रुपये गुंतविले. पैसे गुंतविल्यानंतर त्यांना कोणताही परतावा देण्यात आला नाही.

हा प्रकार १० नोव्हेंबर २०२५ ते १२ डिसेंबर २०२५ या कालावधीत घडला. फसवणूक झाल्याचे लक्षात आल्यानंतर त्यांनी पोलिसांकडे फिर्याद दिली. पोलीस निरीक्षक संगीता देवकाते तपास करीत आहेत.

घर खरेदी करून देण्याच्या आमिषाने ज्येष्ठाची फसवणूक – घर खरेदी करून देण्याचे आमिष दाखवून एका ज्येष्ठ नागरिकाची १२ लाख रुपयांची फसवणूक केल्याचा प्रकार उघडकीस आला आहे. याप्रकरणी शिवाजीनगर पोलिसांनी एकाविरुद्ध गुन्हा दाखल केला आहे. सचिन पद्माकर पावसकर (रा. तारकेश्वर सोसायटी, आनंदनगर, सिंहगड रस्ता) असे गुन्हा दाखल करण्यात आलेल्याचे नाव आहे. याबाबत एका ज्येष्ठ नागरिकाने शिवाजीनगर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार हे ६९ वर्षीय ज्येष्ठ नागरिक असून विश्रांतवाडी परिसरात राहतात. आरोपीशी त्यांची ओळख झाली होती. त्या वेळी आरोपीने पैशांची गरज असल्याचे सांगितले. ज्येष्ठ नागरिकाला घर खरेदी करायचे होते. पुण्यात चांगले घर खरेदी करून देतो, असे सांगून आरोपीने त्यांच्याकडून २८ एप्रिल २०२५ रोजी १२ लाख रुपये घेतले. पैसे घेतल्यानंतर आरोपीने ते परत केले नाहीत. ज्येष्ठ नागरिकाने याबाबत विचारणा केली असता आरोपीने टाळाटाळ सुरू केली. पोलीस उपनिरीक्षक वलसे तपास करीत आहेत.