१३२ म्यूल खातेधारकांविरुद्ध गुन्हे दाखल

‘ऑपरेशन म्यूल हंट’ मध्ये पुणे पोलिसांची कारवाई : १५२ आरोपींना केली अटक

महाराष्ट्र न्यूज नेटवर्क

पुणे : सायबर गुन्हेगारांना कमिशनच्या बदल्यात बँक खाते वापरण्यास देणाऱ्यांविरुद्ध पुणे पोलिसांनी विशेष मोहीम हाती घेतली आहे. अशा १३२ म्यूल खातेधारकांविरुद्ध पोलिसांनी गुन्हे दाखल केले असून १५२ जणांना अटक केली आहे. सायबर गुन्हेगारांचे आर्थिक जाळे उध्वस्त करून ऑनलाइन फसवणुकीला आळा घालण्याच्या उद्देशाने संपूर्ण देशभरात ‘ऑपरेशन म्यूल हंट’ हे देशव्यापी अभियान राबविण्यात येत आहे.

म्यूल बँक खाते म्हणजे काय? – एखाद्या संस्थेच्या किंवा कंपनीच्या नावाने बँकेत खाते उघडून त्यामध्ये सायबर फसवणुकीतून येणारे पैसे स्वीकारण्यास संमती दिली जाते. सायबर गुन्हेगार हे पैसे त्या बँक खात्यात जमा करण्यास सांगतात. फसवणुकीचा पैसा खात्यात जमा झाल्यानंतर बँक खातेदार किंवा स्वतः गुन्हेगार हा पैसा इतर खात्यांमध्ये हस्तांतरित करतात. त्यामुळे पुढे हा पैसा नेमका कोठे गेला, हे समजणे अवघड जाते. केवळ नाममात्र कमिशनपोटी अनेक जण अशी बँक खाती उघडून ती सायबर गुन्हेगारांना वापरण्यास देतात. अशा बँक खात्यांना म्यूल खाते म्हटले जाते.पुणे शहरातील विविध पोलीस ठाण्यांमध्ये १३२ म्यूल खातेधारकांविरुद्ध गुन्हे दाखल करण्यात आले आहेत. बँकांकडून प्राप्त झालेल्या माहितीच्या आधारे १५२ आरोपींना अटक करण्यात आली आहे. समन्वय पोर्टलद्वारे इतर राज्यांकडून प्राप्त १७०५ नोटिसांवर कार्यवाही सुरू असून संबंधितांची चौकशी करण्यात येत आहे. पुणे शहरातून इतर राज्यांतील म्यूल खातेधारकांना २०९९ नोटिसा पाठविण्यात आल्या असून त्यावर पुढील कार्यवाही सुरू आहे. तपासादरम्यान पुणे, मुंबई, नवी मुंबई, छत्रपती संभाजीनगर तसेच इतर राज्यांतील आरोपींना अटक करण्यात आली असून संबंधित प्रकरणांमध्ये न्यायालयात दोषारोपपत्र दाखल करण्यात आले आहे.

तपासाची व्याप्ती – सायबर पोलीस म्यूल खातेधारकांचे आर्थिक व्यवहार, मोबाईल कॉल रेकॉर्ड, डिजिटल व्यवहार, बँक व्यवहार तसेच सायबर गुन्हेगारांशी असलेले संबंध यांचा सखोल तपास करीत आहेत. म्यूल खातेधारकांमुळे सायबर गुन्हेगारांना आर्थिक मदत मिळत असल्याने अशा व्यक्तींवरही सहआरोपी म्हणून कारवाई केली जात आहे.

नागरिकांना महत्त्वाचे आवाहन – कोणत्याही परिस्थितीत स्वतःचे बँक खाते अनोळखी व्यक्तीस वापरण्यास देऊ नये. एटीएम कार्ड, चेकबुक, नेट बँकिंगची माहिती किंवा ओटीपी शेअर करू नये. सिमकार्ड, मोबाईल नंबर, ई-मेल आयडी, आधार कार्ड, पॅन कार्ड किंवा इतर वैयक्तिक माहिती कोणालाही देऊ नये. असे केल्यास संबंधित व्यक्तीवर सायबर गुन्ह्यात सहआरोपी म्हणून कायदेशीर कारवाई होऊ शकते.
सायबर गुन्हेगारीला आळा घालण्यासाठी गुन्हेगारांना पैसे जमा करण्यासाठी म्यूल बँक खात्यांची मदत लागते. त्या साखळीवर घाव घालण्यासाठी आणि सायबर गुन्हेगारांना म्यूल बँक खाती उपलब्ध होऊ नयेत, या उद्देशाने पोलिसांनी ही विशेष मोहीम हाती घेतली आहे.