आरोपींची धिंड, सार्वजनिक अपमान थांबवा
पोलीस आयुक्त अमितेश कुमार यांचा आदेश : भारती विद्यापीठ प्रकरणातून घेतला धडा
महाराष्ट्र न्युज नेटवर्क
पुणे : भारती विद्यापीठ पोलीस ठाण्यातील एका प्रकरणात अल्पवयीन आरोपींची कथित धिंड काढणे आणि त्यांना अपमानास्पद वागणूक दिल्याच्या घटनेनंतर पुणे पोलीस आयुक्त अमितेश कुमार यांनी सर्व पोलीस ठाणे, शाखा आणि वरिष्ठ अधिकाऱ्यांना महत्त्वाचे आदेश जारी केले आहेत.
या घटनेची राज्य मानवी हक्क आयोगाने गंभीर दखल घेत संबंधित पोलीस अधिकाऱ्यांच्या चौकशीचे आदेश दिले आहेत. आरोपींना कथित अपमानास्पद वागणूक दिल्याचे काही व्हिडिओ सोशल मीडियावर मोठ्या प्रमाणात व्हायरल झाले होते. भारती विद्यापीठ पोलिसांनी अल्पवयीनांना मोटारीच्या बॉनेटवर बसवून धिंड काढल्याचा, तसेच लक्ष्मीनगर पोलिसांनी भर रस्त्यात आरोपींना उठाबशा काढायला लावणे आणि बेडूक उड्या मारायला भाग पाडल्याबाबत तक्रारी करण्यात आल्या होत्या.
पुणे पोलीस आयुक्तालयाने जारी केलेल्या सविस्तर परिपत्रकात सर्वोच्च न्यायालय, राष्ट्रीय मानवी हक्क आयोग आणि महाराष्ट्र पोलीस महासंचालक यांच्या विविध आदेशांचा संदर्भ देण्यात आला आहे.
परिपत्रकानुसार, कोणत्याही आरोपीची धिंड काढू नये किंवा त्याचा सार्वजनिक अपमान होईल, असे कोणतेही कृत्य करू नये. आरोपीला उठाबशा काढायला लावणे, वाहनावर उभे किंवा बसवून फिरवणे, दोरी किंवा साखळीने बांधणे अथवा कोणत्याही प्रकारची अपमानास्पद वागणूक देण्यास स्पष्ट मनाई करण्यात आली आहे.
आरोपीला अटक केल्यानंतर न्यायालयासमोर हजर करेपर्यंतची संपूर्ण प्रक्रिया भारतीय नागरिक सुरक्षा संहिता, महाराष्ट्र पोलीस मॅन्युअल आणि न्यायालयीन निर्देशांनुसारच राबवावी, असे आदेश देण्यात आले आहेत.
सर्वोच्च न्यायालयाच्या डी. के. बसू विरुद्ध पश्चिम बंगाल सरकार या ऐतिहासिक निकालातील मार्गदर्शक तत्त्वांचे पालन करणेही बंधनकारक करण्यात आले आहे.
या सूचनांचे उल्लंघन झाल्यास संबंधित अधिकारी किंवा कर्मचाऱ्यांविरुद्ध शिस्तभंगाची तसेच आवश्यक ती कायदेशीर कारवाई करण्यात येईल, असा स्पष्ट इशाराही देण्यात आला आहे.
